Fraccion di AVP ta mirando kico tur ta pasando cu e maneho riba e situacion na Venezuela y con esaki ta afectando Aruba. Nos pueblo ta birando cada dia mas y mas intrankil, pasobra tur caminda por tuma nota di desaroyonan negativo ta pasando na Venezuela. Pero nos no ta ricibiendo un splicacion of aclaracion door di gobierno riba e efectonan di e desaroyonan aki pa nos isla.

E gobiernonan di Mike Eman semper a duna hopi informacion na pueblo di un forma cla y consistente ora esaki tabata necesario. Awor nos por mira cu e gobierno di Curaçao tin nan pueblo miho informa cu nos riba e problema aki. Den e caso aki, nos por bisa cu dia 6 di Februari ultimo tabatin un reunion den Parlamento riba e topico di Venezuela. Prome minister y minister di husticia a bini pa duna informacion na Parlamento encuanto e situacion na Venezuela. No a bini mucho informacion pa dilanti den e reunion ey, pero desde e fecha ey no a bin ningun update mas di nos gobierno riba e situacion.

E unico manera pa mantene bo pueblo trankil memey di tur e desaroyonan aki, ta pa gobierno mantene su pueblo bon informa. Asina ta evita speculacion y panico. Mester tin un update por lo menos 2 biaha pa siman y si ta necesario diariamente, pa splica kico ta pasando y kico pueblo por spera. Fraccion di AVP a tuma nota den prensa cu tin coalicionnan di paisnan amigo y enemigo di Venezuela ta formando y nos gobierno ta keto. Nos no sa kico por spera. Ta berdad cu maneho di asuntonan exterior ta den man di gobierno di Reino, pero si nos gobierno no ta trahando cu alma y cuerpo pa haya informacion pa nos comunidad, nos lo keda mal informa como pueblo y esaki ta laga espacio pa tur sorto di speculacion cu ta algo innecesario.

E falta di duna informacion aki ta muestra di un gobierno cu no ta liderando manera mester ta. E ta muestra di un gobierno cu ta bezig cu cosnan menos imporante cu loke pueblo realmente ta precupa p’e. Un gobierno cu a campaña cu e lema “sin miedo”, mester demostra esey awor cu nan ta den gobierno. No por tin miedo pa goberna ora cos bira dificil, no por tin miedo pa deal cu partnernan internacional, no por tin miedo pa informa pueblo corectamente y constantemente. Awor di berdad pueblo su stoma a yena y mester bin un cambio y e cambio aki mester bin pronto.

FIN