Pueblo di Aruba lo bai urna electoral diabierna awor dia 25 di juni
E biaha aki tin un situacion diferente di COVID 19 durante cual nos pueblo a y ta sufri hopi.
Hopi hende ainda ta sin trabou.
Un cantidad no a haya ni loonsubsidie, fase ni pakete di cuminda. Otro a bira malo y hasta a perde nan sernan keri. Probleman social despues di crisisplan no a ser frena sino a sigui crece. Hasta tin diferente asesinato dor di hobennan.
Den e situacion aki gobierno cu a firma un pakete di medida pa castiga nos pueblo. Despues a dicidi di bandona su trabou, es decir tuma su retiro. Aki por constata falta di responsabilidad di parti gobierno. Nan a kita foi trabou y awor nan ta tur dia ta exigi pueblo pa pone nan bek eynan pa sigui cu medidanan. Paso Evelyn su interes ta pa sigui cu e pakete di medidanan cu el a firma.
Mientrastanto miebronan di e gobierno demisionario aki ta core cu busnan grandi full drecha y ta kere asina nan ta haya voto mientras nos pueblo ta den pobresa. Tin keho alabes cu miembronan di e gobierno demisionario ta partiendo pakete di cuminda y regalando placa pa pone bandera. Por a tende hasta cu ta paga pa baha bandera di AVP, mientras esnan di AVP
Pues cu placa di pueblo probablemente esaki ta sosode.
Unda integridad a keda?
Gobierno no tin justicia social na pecho paso ta esnan cu pone bandera di nan partido ta haya pakete di cuminda, placa of ta wordo yuda. Esnan cu para pa nan principio ta wordo over geslagen.
Nos merece un gobierno cu ta traha cu curason pa un y tur.
Un gobierno cu tin e interes di esnan vulnerable den nos comunidad na pecho y un gobierno cu por deal debidamente cu Hulanda pa saca nos pais padilanti di e medidanan y bin cu proyectonan pa rescata, renoba y reconstrui nos pais.
Na e momento aki ta necesario pa nos crea empleo pa yuda nos hende pa para bek ariba nan pia. Ta necesario pa esnan cu no tin awa na cas haya awa pa bebe
Tambe mester registra y yega na esnan cu no tin nada pa come pa asina nan tin prioridad pa ser yuda.
Alabes nos tin cu salvaguardi nos salubridad publico. Mester elimina e medidanan den cuido pa garantisa cu nos hende por haya un bon cuido di salud.
Gobierno a retira su mes for di e responsabilidad di gobierna pero awor ta solicita bek pa goberna.
Durante esaki gobierno kier a introduci conteo electronico, locual no a logra y cu a haya hopi critica di tur skina. Alabes gobierno no ke pa partidonan por haya e kiezersregister. Esaki ta muestra di intransparencia di parti di e gobierno demisionario aki.
Gobierno di AVP lo garantisa husticia social pa nos hendenan den cual tin respet pa derecho di nos ciudadanonan en especial pa esnan vulnerable den nos comunidad, manera nos grandinan, hende muher/homber den dificultad, nos muchanan y hobennan y esnan cu limitacion. Nos lo garantisa mihor oportunidad pa nos hobennan y pa famianan po haya sosten pa nan yiunan por participa na actividadnan di cultura, arte y deporte y cu nan por cumpra nan tablet pa skol. Ademas mayornan lo por haya un sosten tambe pa muchanan bao 18 anja cu tin un of otro limitacion. Pues goberancion proximo lo tin justicia social como prioridad.
