Como politico serio kende kier traha pa bienestar di su pueblo y di su pais, no ta na su luga pa manipula cu inteligencia di un pueblo, sigur no pa haya sosten pa drenta gobierno pa despues traha cantidad di storia ficticio, pa hustifica bo incapacidad pa goberna e pais.
Parlamentario Marlon Sneek di fraccion di AVP a mustra cu ta Prome Minister ‘herself’ a publica cantidad di promesa den medionan di comunicacion y social, sigurando pueblo cu su partido MEP tin tur situacion bou di control y cu lo atende e situacion financiero di pais Aruba, den un lapso di 30 dia sin cu mester bay over na tuma medida contra pueblo.
“Despues cu a pasa e periodo den cual Gabinete Wever Croes lo a presenta su maneho financiero sin castiga pueblo cu medida, ta bin Sali na cla cu tur loke Prome Minister a bisa como lider politico den campaña, tabata palabranan sin contenido, promesanan bashi cu a wordo uza pa manipula e decision di pueblo na momento di eherce nan derecho di voto.
Ta imposibel pa haya un otro splicacion pa loke Prome Minister y su gobierno di coalicion kier haci awor, castigando pueblo c’un aumento di 2.5% di BBO cu lo afecta bida di tur hende riba e isla aki.
Durante di campaña Prome Minister Wever Croes a informa, of miho bisa a sigura pueblo cu su gobierno lo reduci cantidad di Minister na 7 cu cual su gobierno lo bay tin 17 miyon extra cu lo sirbi como parti di su vision pa baha gastonan di gobierno.
Tur esaki el a sigura tambe na momento cu el a wordo nombra como Formado di e actual gabinete, entre otro sigurando den conferencia di prensa na pueblo cu cualkier partido cu kier forma parti di su gobierno nobo, MESTER acepta un gabinete cu 7 minister of nan por lubida di forma parti di su gobierno.
Sinembargo 7 minister a resulta di ta 8 minister y hunto cu’ne a acomoda otro candidato di su partido como e di 9 minister bou di e supuesto capa di “staatsecretaris’ loke nos no conoce aki na Aruba, pero ta actuando como minister.
Na mes momento como punto dos di su plan di ‘3 stap premier Wever Croes a sigura pueblo cu su gobierno lo bay baha e cantidad di coordinadornan den su gobierno pa asina e logra scapa 24 miyon cu gobierno lo tin extra pa soluciona e situacion financiero, como parti di su plan y vision pa atende cu e situacion financiero di gobierno.
E di tres medida cu Evelyne Wever Croes a priminti di lo ehecuta pa scapa placa, ta cu su gobierno lo baha gasto di biahamento, di fiestamento y di propaganda cu cual e lo spaar 9 miyon florin pa un total segun su propio palabranan, di 50 miyon florin.
Gasto di celebracion di Arubadag na Hulanda a Sali tres bes mas caro cu e añanan anterior.
E suma di 50 miyon cu Premier Wever Croes a anuncia awor cu MEP ta den gobierno, a smelt manera ijs den solo y na luga di spaar 50 miyon florin, gabinete Wever Croes a dicidi cu ta pueblo tin cu carga e peso di su incapacidad pa hiba un maneho finaciero responsabel.
Ta algo serio y sin un tipo di remordimento gabinete WeverCroes ta haya ta bon cu ta pueblo tin cu bay paga pa su mentiranan, pa su falta di vision, pa su falta di capacidad pa hinca un plan di maneho di e pais den otro, caminda pueblo lo no sinti e medidanan anuncia den su cartera,” lider di fraccion di AVP ta mustra.
