Den un carta dirigi na Presidente di Conseho di Minister di Reino, Prome Minister Rutte, Evelyn Wever Croes Prome Minister di Aruba, ta confirma cu desde 2015 durante gabinete Mike Eman II, Aruba a bin ta cumpli cu tur normanan palabra cu Hulanda.
Lider di fraccion di AVP, sr Marlon Sneek ta mustra cu un biaha mas por ripara e falta di seriedad y e insistencia di Premier Wever Croes pa trata di gaña pueblo di Aruba y gobierno di Hulanda riba e situacion financiero di Aruba y cu awor e mes ta contradeci su mes.
“Esaki ta mesun Prome Minister cu constantemente ta papia di desaster financiero, cu a gaña pueblo cu su gobierno a bin haya un desaster financiero pero awor e mes ta bin dilanti y admiti cu cosnan tabata bayendo den e bon direccion bou di maneho di gabinete Mike Eman II.
Riba pagina dos di su carta dirigi dia 7 di oktober ultimo, Prome Minister Wever Croes ta mustra lo siguiente bou di e cabes di “Nakoming normen financieringssaldo:
Sinds de invoering van LAFT in 2015 heeft Aruba aan de afgesproken normen voldaan, met uitzondering van de jaren 2017 en 2018. In 2017 slaagde het vorige kabinet er niet in om binnen de geldende norm te blijven, Daarna kwamen de verkiezingen en trad het huidige kabinet aan. Dit kabinet werd in 2018 toegestaan na advies van het CAFT, en gelet op de op dat moment heersende slechte stand van de overheidsfinancien, om af te wijken van de geldende wettelijke norm in de LAFT, onder di voorwaarde dat Aruba onder het tekort van 2017 bleef. Hieraan heeft Aruba voldaan. Het financieringssaldo over het eerste halfjaar van 2019 heeft zelfs een surplus 2%.”
Pues aki por ripara cu claramente Prome Minister ta bisa Presidente di Conseho di Ministernan di Reino, cu gobierno di AVP si a cumpli cu normanan palabra cu Hulanda y tabata riba caminda pa loke esaki tambe den presupuesto di 2017.
Sinembargo den su esfuerso grandi pa papia e berdad, Evelyn Wever Croes no por a sigui mucho, insinuando cu gobierno di AVP no a cumpli cu e normanan stipula cu presupuesto 2017.
Aki Prome Minister ta bolbe mustra cu e no ta capas di papia berdad, e no ta sincero cu su mes y e no ta sincero cu gobierno di Reino, ya cu ta su gobierno ora cu a tuma mando na 2017, a introduci cantidad di cambio den e presupuesto di 2017 pa asina crea e impresion cu no a cumpli cu e normanan, lubidando cu e cambionan aki ta su gobierno mes lo carga e consecuencianan di e cambionan aki.
E norma di -0.5% tabata haalbaar den presupuesto di 2017 pero hungando su weganan politico sin sentido, Prome Minister Wever Croes su gobierno a tira su mes den pia y awe e ta carga e consecuencianan di esaki.
Aki tampoco e ta menciona cu desde e tempo ey, gabinete Wever Croes no ta bin ta cumpliendo cu ningun norma palabra entre su persona y Minister di Finansa Xiomara Ruiz Maduro y gobierno di Reino, caminda na 2018 a firma un protocol cu su gobierno mes a bin ta violando for di e momento ey.
Tur e weganan politico cu e kier hunga cu gabinete anterior, a bin ta perhudicando su propio gobierno y henter e pais, caminda despues di a sigura pueblo di Aruba cu su gobierno lo no tuma medida pa atende cu e situacion financiero, a suta tur hende cu medida, creando un situacion dificil cu ainda pueblo no sa con pa sali di esaki.
Es mas, e maneho financiero pa cu presupuesto 2019 ta asina bruha y sin pia ni cabes, cu awor ainda gabinete Wever Croes no por keda cla cu presupuesto 2020 cual tambe el a sigura Hulanda cu esaki lo ta na tempo, ya cu su gobierno no por keda cla cu normanan stipula pa cu presupuesto 2019, caminda tin buraco di miyones pa cera ainda.
E carta aki traha pa Prome Minister Wever Wever Croes y manda pa Premier Rutte di Hulanda, ta bolbe mustra loke ya henter pueblo sa caba, esta cu Prome Minister tin problema serio pa papia e berdad y carga su responsabilidad manera cu mester ta y e tin cu stop di busca excusa pa su propio fracaso, su propio mal maneho di finansa publico,” lider di fraccion Marlon Sneek a declara.
