E mensahe cu Prome Minister Evelyn Wever Croes a pone riba su red social caminda el a pone: “People, money spent on my family is worth every cent” ta algo hopi berdad ya cu en berdad tur loke cabesnan di famia gasta cu nan famia, ta bale la pena.
Melvin Tromp di AVP ta mustra cu mientras cu Prome Minister kier hustifica su decision di bay cu vacacion den un pandema serio cu ta asotando pueblo di Aruba y henter munto, ta simplemente un ridicules cu ta bolbe confirma su falta di conbibencia c’un pueblo di Aruba cu ta pasando momentonan hopi dificil.
“E post di Prome Minister Evelyn Wever Croes ta mustra realmente un mentalidad cu cual el a bin ta gobernando nos pais, caminda cu simplemente pueblo di Aruba tin un Prome Minister cu no ta sinti compasion cu su pueblo pero solamente su famia.
Ta facil, sumamente facil pa Evelyn post algo asina, tratando di hustifica cu su persona a inverti hustamente den bienestar di su famia pero en realidad den un comunidad di Aruba cu ta pasando den momentonan dificil, e observacion aki a cay hopi duro.
Pa colme tin otro publicacionnan cu ta Sali riba rednan social y medionan di comunicacion, cu ta mustra cuanto hende tin problema, hendenan cu ta wordo confronta cu beslag riba nan propiedad pa motibo di incumplimento di pago pero ta hendenan cu simplemente no tin entrada pa haci mucho cos den e dianan dificil ak.
Ultimo dianan por a lesa entre otro un famia cu tin hopi siman sin electricidad, otro cu a bin dilanti y bisa cu Minister Glenbert Croes a gaa su persona caminda a priminti’e cu e lo ricibi ayudo di onderstand pero no a haya esaki te dia di awe.
Tin otro famia cu a wordo saca di nan cas pa motibo di no a cumpli cu pago di nan hipoteca, otronan cu tin problema pa cumpli cu pago di number di auto y riba dje ta wordo confronta cu e multa pa esaki, cual ta pone cu nan problema financiero a bira ainda mas grandi.
Varios famia cu tin problema pa pone pan riba mesa tur dia, hendenan cu a wordo manda cas den practicamente tur sector laboral y caminda no ta tur tabatin suerte di a logra di haya ayudo di fase cu riba dje ta yuda un tiki pero no por cumbri tur gasto si sobrevivencia.
Prome Minister Evelyn Wever Croes ta bolbe mustra cu e lema di “friends and family” ta sagrado den e bida diario di su carera politico, caminda tur cos ta hancho pa su persona y su famia pero no pa pueblo.
Como lider politico, cualkier lider politico y sigur un lider di un pais cu ta pasando den momentonan dificil, ta normal pa politiconan cu realmente ta goberna pa bienestar di nan pueblo, ta biba pa yuda pueblo den tur sentido di e palabra, lo no duna un ehempel asina cruel di lanta bay cu vacacion pa gosa y gasta placa na Miami, anto un grupo di mas cu 27 mil persona, no tin un entrada drechi pa nan sobrevivi diariamente.
Esey ta e indicacion cu Evelyn, lider di MEP y lider di e pais ta dunando na pueblo na e momentonan aki, caminda riba dje el a biaha pa un di e paisnan caminda e brote di corona virus ta sigui aumenta y sigui bira mas grandi ainda.
Evelyn y su gobierno ta manda tur hende keda cas, pa tuma precaucion pa no plama e virus aki, ta impone toque de queda, ta impone den un forma disciplinario mientras cu su persona ta lanta bela bay Miami caminda practicamente el a mustra cu e ta iresponsabel.
Sinembargo semper e mentalidad politico aki di e lider di partido MEP tabata conoci caminda famia bin prome y ora cu e yega Aruba bek tin cu mira si e lo bay den cuarentena obligatorio di dos siman manera tur hende supuestamente tin cu haci.
Aki pueblo por mira e mentalidad di e gobierno cu tin na mando na e momentonan aki, ya cu ningun otro hende mag di fiesta, ningun hende por bay diadomingo canto di lama cu nan famia, no por organisa un fiesta di famia na cas, ya cu nan lo yuda plama e virus.
Ta cosnan cu Evelyn y su gobierno a critica hopi, yamando hasta nos hendenan pa ta iresponsabel y cu nan ta falta seriedad pero atrobe pa su famia e reglanan aki no ta conta.
En berdad tur cen gasta riba famia ta bale la pena pero tambe ta bale la pena keda Aruba y sigui busca solucion pa famianan cu ta pasando den situacionnan realmente serio pero atrobe ta di Evelyn Wever Croes y MEP nos ta papiando y e ora tur hende por compronde,” Melvin Tromp di AVP a declara.
