For di momento cu pueblo lesa of scucha declaracion di Prome Minister Evelyne Wever Croes, kende ta bisa cu cu “prijs di awa y coriente no lo subi pero no pa largo tempo” esaki ta un aviso concreto na direccion di pueblo cu: ‘prijs di awa y coriente ta bay subi.”
Parlamentario pa fraccion di AVP, sr Mike de Meza a mustra cu aki un biaha mas pueblo ta wordo confronta cu e cara gañado di un Prome Minister cu a priminti pueblo un cos durante di campaña electoral, pero awor ta bira haci net lo contrario.
“Di cas pa cas Evelyne a pasa hunto cu su ministernan cu ta gobernando e pais aworaki sigurando pueblo cu nan lo baha prijs di awa y coriente, culpando gobierno di AVP di ta culpabel pa e prijs di awa y coriente pa motibo cu a permito WEB Aruba NV hedge.
Awor e mesun Evelyne aki como Prome Minister ta para dilanti camara sigura pueblo cu den e dianan aki, prijs di awa y coriente lo no subi y despues di hala un rosea grandi pa e mes convence su mes, anuncia cu esaki lo no dura mucho pa subi.
Esaki ta e prome minister cu ta guiando e pais aki den rumbo robes, den rumbo di perdicion, pa colmo hungando fuerte, bisando pa WEB no bin bati na su porta na aumento di prijs di awa y coriente, ya cu e lo no sostene esaki.
Pero e mes ta sigurando pueblo cu dentro di poco e prijs di awa y coriente lo subi y cuno tin awa pa laba y ta papiando di factornan externo cu ta influencia e tarifanan y na mes momento lubidando por completo cu ta su gobierno a prohibi WEB inicialmente di hedge.
Despues a dicidi di hedge pa algun luna pero despues a bolde dicidi di no hedge y pa motibo di e weganan politico aki cu prome minister kier a hunga, awe ta pueblo tin cu bay paga pa e situacion aki, cu ta mas castigo ainda cu pueblo tin cu bay carga despues di a wordo castiga caba cu aumento di BBO.
Ta realmente tristo pa un prome minister ta bin haya sa cu WEB mester bay subi prijs di awa y coriente, despues c’un medio di comunicacion a haci un entrevista cu director di e compania y despues c’un carta di e compania dirigi na gobierno, lo a lek den prensa.
Prome Minister Wever Croes ta bisa cu su contesta riba e carta pa aumento di prijs di awa y coriente na WEB ta “cla y raspa” pero awor su mes ta bin duna un declaracion den cual e ta sigura pueblo cu aumento ta na caminda, faltando algun dia of siman.
Sinembargo e curashi di mas grandi di e prome minister ta caminda e ta bisa cu el a ordena e companianan di utilidad aki, cu nan tin cu baha gasto di personal prome cu bay over na aumenta prijs, mientras cu su gobierno mes ainda no por cumpli cu exigencia di CAFT y Hulanda pa reduci gasto di personal cu 12 miyon florin den e presupuesto di 2018.
Fuera cu su gobierno no a hedge na tempo ora cu e prijs di combestibel tabata ainda na un prijs aceptabel, prome minister a dicidi pa exigi tur compania di gobierno, entrega miyones na dividendo na su gobierno, loke a crea tambe na e situacion precario cu tin awor aki na WEB.
Pues pueblo tin cu prepara su mes pa un aumento di prijs di awa y coriente caminda tur cos ta mustra cu pa prome cu fin di aña, esaki lo ta un hecho ya cu si e no permiti esaki, prome minister lo hinca e companianan di utilidad aki den problemanan financiero hopi grandi,” Parlamentario Mike de Meza a mustra.
