Durante tres aña e coalicion di MEPORED lidera pa Evelyn Wever Croes a purba di tur manera pa goberna nos pais. Pero pa falta di vision y capacidad mester conclui cu esaki no a logra. Ningun promesa di campaña a wordo inicia y mucho menos cumpli.
Nos pais no a move ni un paso padilanti, pero alcontrario a solamente keda bai atras degenerando. Ningun hende tabata central, manera cu nan a promete. Solamente esnan den e circulo supremo di “friends and family” a gosa di e previlegio pa por enrikece nan mes bow liderasco di Evelyn Wever Croes. E unico cos cu e pueblo a sinti ta medida, persecucion, instabilidad y insiguridad den tur sentido di palabra. Ningun cupo di trabou nobo a wordo crea y ningun speransa por a wordo visualisa of concretisa.
Mandatarionan notabel pa ta vengativo, incapas, sin vision alguno ta na cabes di e pais aki. Fayonan flagrante den maneho y continuamente den diferente crisis cu nan mes ta crea. E instabilidad den e gobernacion actual ta asina bisto cu pueblo ta grita y anhela un cambio pronto cu por trece pas, trankilidad y progreso bek den nos comunidad. No tin ningun proyecto cu e gobierno actual por a bin cune cu a bira un hecho y cu ta destina pa sirbi e enteres general di nos pais y nos pueblo!
E unico strategia y argumento cu e gobierno actual ta purba na husa pa hustifica su debilidad y incapasidad pa goberna nos pais ta di crea storianan infunda den forma devastador pa asina duna falta na e gobierno anterior y sconde nan mesun inabilidad pa por a goberna nos pais. Pueblo lo mester puntra nan mes kiko e gobierno actual realmente a logra cu ta beneficia nos pueblo?
Si mira tur e promesanan di campania cu e gobernante nan a bende pueblo, kiko awe ta loke e gobierno aki a cumpli cu ne?
Tuma por ehempel: kiko a para cu e prijs di awa cu coriente cu nan a priminti di baha cu 50%; e rebaho tambe di gasoline y diesel cu 50%; e edad di pensioen na 62 aña; e tantisimo inversionistanan cu nan tabatin pa e refineria; e parkeermeters y e centro di cuidad; e school di HAVO y VWO; e fast ferry y e waf nobo pa San Nicolas?
Niun di e cosnan ta relata na e crisis mundial cu nos ta bibando aden y realmente nan no lo a cumpli ni si no tabata tin Covid. Awe cabinete Evelyn Wever Croes ta sconde tras di tur sorto di cos, pero nunca nan tabata tin plan pa un progreso pa nos pais.
E uniko cos cu e gobierno actual a sa di crea ta mas y mas instabilidad y incertitumbre. Wak cuanto manifestacion y demostracion tabatin durante e ultimo tempo; cuanto disgusto den comunidad local pa falta di perspectiva economico. Inseguridad den pueblo pa falta di un maneho pa combati criminalidad; enseñansa den un incertitumbre total. Un situacion social devastador cu lo empeora y un falta di comunicacion cu pueblo y cu stakeholder. Esakinan ta djis algun precupacionan, comentarionan y kehonan cu por scucha tur dia den comunidad.
Ademas di esaki Prome Minister Evelyn Wever Croes y Minister di Finansas y Economia Xiomara Maduro a acorda cu y firma cu Hulanda pero na fin didia e gobierno actual no a cumpli! Awor Aruba ta para dilanti porta pa perdida di su autonomia pa dicidi y goberna su mesun pais. Awor Hulanda kier impone dos Rijkswet riba e gobernacion di Aruba. Pa motibo di e frustracion grandi cu pueblo ta sinti pa cu e gobernacion di MEPORED, hopi ciudadano ta kere cu intervencion di Hulanda ta na su lugar. Locual hopi no ta realiza ta cu esaki lo tranca futuro gobernacionan cu si tin vision. Kita autonomia di Aruba dor di Hulanda lo causa un paro formal den crecemento economico di nos pais. Wak e desaroyonan na Corsow y Sint Maarten for di 10-10-’10 te cu awe! Ta lastima cu hopi no tin e nocion, of a lubida, con economia y desaroyo di Aruba tabata wordo frustra den e constelacion Antiyano y tin biaha door di Hulanda mes prome cu status aparte. Ta un lastima cu awor Aruba tin un gobierno instabil cu falta capacidad pa realmente negocia, cumpli cu acuerdonan y para pa nos autonomia!
Esaki ta un gobierno cu a conoce tanto turbulencia interno caminda a cambia 3 parlamentario for di e coalicion cu ta sostene gobierno, ademas di un parlamentario cu a bira independiente. Awor tin hasta un minister independiente na porta pa wordo retira for di e mesun gobierno cu den parlamento ela sostene tur ora. Ta un lastima cu esnan den e gabinete Evelyn Wever Croes mes no ta realisa cu pueblo ya no tin speransa mas den e coalicion actual, cu nan no tin ningun autoridad moral mas y Prome Minister tin cu tuma honor na su mes y entrega su gobierno!”
