Tempo di cauch’l baulo a pasa  pero gobierno di MEP ainda ta kere cu nan por bin cu nan mentiranan  y cu na por ‘get away’ cu esakinan pero awendia nan no por scapa cu e cosnan aki mas, pasobra institutonan ta na ordo, caminda awe Jaarrekeningnan ta Sali caminda nan ta bisa kico a pasa y kico a wordo haci, lider di fraccion di AVP Marlon Sneek a trece dilanti.

“Ora cu nos haya un minister presidente ta trata di crea un fantasia politico pa tapa tur fracaso di su gobierno te cu awor, por mira mesora cu tur loke e ta bisando no ta cuadra cu berdad di e situacion.

Por ehempel durante tratamento di presupuesto supletorio  2017, nan a bin bisa cu Refineria di Aruba no tin placa pa paga pa e FMSA cu ta e ‘fuel marketing system’  y awe pueblo por mira cu nan ta bay haya dividendo di mesun RDA aki cunan a bisa cu nan no tin placa.

Awor prome minister ta bolbe hunga rol  y ta papia di un investigacion cu mester wordo haci riba Jaarrekening, mester bisa cu si su gobierno a gewoon sigui manera cu e presupuesto 2017 tabata traha, percura pa RDA paga loke e tabatin pa paga, y tambe no a bin gaña cu AZV tabatin mester di extra placa, no a bay gasta placa  den renobacion di pareti di e edificio di gobierno, despues cu nan mes a bisa cu pueblo no por come bloki cu klinkers, pero si a haci esaki den e presupuesto supletorio, simplemente pa purba di hisa e cuota di debe y asina bende esaki politicamente cu ta AVP ta esun cu lo a haci esaki.

Pero nan a lubida cu den un ‘jaarrekening’ ta tene cuenta tambe cu e ‘collectieve sector’ y locual cu a pasa manera na SVB cu tabatin cero plus,  locual a pasa na AZV cu tambe tabatin cero plus, ta duna un otro imagen di kico a pasa realmente cu e parti di finansa di e pais aki.

Mi ta convenci cu si nos kita  e 74 miyon cu Refineria di Aruba mester a duna pa e compra di FMSA, tanto na pompstationnan, esun na aeropuerto y tambe WEB, nos por tabatin garantia y no a bin crea fantasia cu nan lo a haya n AZV cu lo tabatin mester di placa extra y si nan no a nomber e cantidad di hendenan extra cu nan a nombra manera cu Raad van Advies a señala, mi ta garantisa cu nos lo a logra un cuenta anual cu lo a duna e imagen manera cu el a duna na 2015, cu nos a cumpli cu e normanan cu ta para den e CAFT  y lo nos tabatin awe un CAFT cu lo a desaparece manera e ta poni de ley cu a wordo aproba na 2015.

Na 2018 mester a presenta un presupuesto di cero plus cu  lo a bira e ultimo aña di CAFT lo a existi aki na Aruba pero gabinete Wever Croes a scoge pa tuma e caminda pa purba crea un monster y bende esaki pa nan mustra nechi, lubidando cu awe nos ta bibando den un otro mundo cu tur documento ta bay bin dilanti y tur documento ta bisa tur loke a tuma luga.

Locual sigur nos ta sigui remarca ta cu e mesun prome minister cu ta supuestamente insisti cu mester respeta organonan, no ta respeta esakinan y no ta duna nan espacio necesario pa haci nan trabou, pa hiba nan control riba e jaarrekening pa despues entrega na Parlamento nan verslag pero ta cuminsa adelanta, cuminsa tira para, papiando yen di disparate y esaki sigur ta algo di condena ora cu nos mira un minister president cu a priminti asina hopi y awe ta faya den su promesanan,” Parlamentario Marlon Sneek a declara.