Diabierna ultimo, Parlamento a haya un ley for di gobierno caminda riba pagina 4 di e ‘memorie van toelichting’ ta mustra cu gobierno ta bay duna CITGO un ‘discharge’ di 175 miyon dollar, segun lider di fraccion di AVP, sr Marlon Sneek a declara durante un conferencia di prensa diamars mainta.
Na mes momento sr Sneek a mustra cu nan a tuma nota di e hecho cu Raad van Advies ta cuestiona e hecho cu nan no ta haya cu ta corecto cu e ley aki a yega cerca nan, sin cu esaki tabatin un splicacion, sin cu tabatin e decision final di kico exactamente gobierno ta bay ‘give away.’
“Tur loke por saca di henter esaki ta cu gobierno ta bay regala 175 miyon dollar na CITGO y pa nos esaki ta di lamenta, sigur ora cu nos mira con dialuna Minister Presidente ta declara cu no tin espacio pa yuda pueblo cu prijs di awa y coriente mas barata, mirando cu a pidi tur hende keda paden y automaticamente lo gasta mas awa y coriente.
Pero kico Minister Presidente a sugeri pueblo pa haci, ta di habri tur bentana di cas pa biento pasa pero ta bira bay regala CITGO un suma di 175 miyon dollar y tur esaki den un situacion caminda tur pais rond mundo ta den un lockdown.
No tin hende pa negocia cune y e ora tin di puntra ta kico ta e urgencia pa bay regala e placa aki caminda nos mes como pais Aruba, ta den necesidadanan serio.
Pa nos fraccion e desaroyo aki ta pone cantidad di alarma zona caminda por anticipa cu lo bay tin un hende cu ta bay biba ‘lekker’ di e asunto aki y ta lanta e pregunta ta kende gobierno ta bay fix?
Ken gobierno ta bay previlegia atrobe riba lomba di pueblo di Aruba y esaki ta inaceptabel ya cu nos sa cu ‘friends and family’ a djodjo tur caminda y nos no ta spera cu atrobe ‘friends and family’ un biaha mas mester bay djodjo riba lomba di comunidad.
E cos aki ta inaceptabel y pa e motibo aki nos a manda un carta pa Presidente di Parlamento den cual nos ta bise cu absolutamente cu no y cu nos peticion ta pa no trata e ley aki ya cu no tin ningun urgencia.
Si nos tuma ehempel di Corsou caminda Clash a manda carta bisando cu nan ta para tur negociacion aworaki pa motibo cu tin incertidumbre grandi riba kico lo bay ta e futuro pero aki na Aruba gabinete Wever Croes ta ansha pa regala 175 miyon dollar. Na kende?
No ta un ley di urgencia y e ley aki lo no trece ningun florin den caha di gobierno y lo no yuda alivia e presion cu tin riba pueblo cu absolutamente nada pero aki ta simplemente regala un cos na un hende caminda nos no sa pakico esaki tin cu tuma luga di e forma aki.
Nos no sa y gobierno no a bisa ningun momento kico ta su meta y ora bo traha como gobierno, bo meta mester ta bienestar di pueblo y di e pais y awor nos ta mira cu gobierno kier bin c’un ley cual no ta privilegia pueblo den nada, ya cu ta regala ta bay regala 175 miyon dollar.
Tur esaki caminda den e contract cu tin riba mesa, ta poni bon cla cu si CITGO no cumpli cu esaki, ta CITGO tin cu paga y si e kier bay e tin cu bisa cuanto e kier duna pa bay y no por lanta bela bay sin paga nada.
Na e momentonan aki pais Aruba tin un contract cu ta garantisa 175 miyon dollar y gobierno kier laga nan bay sin paga algo sikiera y esaki no ta aceptabel pa fraccion di AVP y nos ta lanmenta cu gobierno ta haci mal uso di e oportunidad aki.
Probechando cu tur hende ta den cas, cu tur hende ta spanta pa loke ta pasando, pa probecha di e situacion pa bay busca un forma pa pasa un ‘machtiging’ cu cual ta duna gobierno un ‘carte blanche’ pa bay regala 175 miyon dollar di e pais aki y esaki ta inaceptabel.
Fraccion di AVP lo bay entrega un carta tambe na Gobernador ya cu na final di dia ta gobernador lo mester bay firma e ley aki despues cu e marionetanan den parlamento cu ta sostene gobierno vota pa esaki y nos ta spera pa Gobernador para banda di pueblo.
Tambe nos a manda un carta pa comisionnan cu nos a participa cu nan na Hulanda y tambe na Minister encarga cu Asuntonan di Reino mustrando cu e cos aki ta inaceptabel ya cu ta bay pasa un ley cu no ta beneficia pueblo y na e momentonan aki no tin ningun hende pa negocia,” lider di fraccion di AVP, Marlon Sneek a declara.
