PDiamars mainta Presidente di Parlamento a yama un ‘bijeenkomst’ den cual reunion gobierno cu representacion di Prome Minister Evelyn Wever Croes, Minister di Finansa Xiomara Riz Maduro, Minister di Husticia, Andin Bikker y Minister di Enseñansa, Rudy Lampe.
E reunion a wordo yama pa gobierno informa Parlamento riba propuesta y varios punto cu Hulanda a pone riba mes, pa por duna Aruba e di tres ‘tranche’ di placa pa pais Aruba por cubri cu su gastonan pa luna di juli, augustus y september.
Miembro di fraccion di AVP, sr Benny Sevinger despues di e reunion a declara cu for di dialuna caba nan a tende Minister Presidente a haya un lista largo di casi 250 pagina y den cual tin 18 punto nobo como condicion, cu a wordo poni riba mesa, pa gobierno di Aruba tuma un decision prome cu diabierna venidero.
Ta depende e decision cu gabinete Wever Croes tuma relaciona cu e condicionnan aki, gobierno di Reino lo dicidi e ora si lo duna Aruba placa pa cubri su gastonan.
“Loke primeramente a straña nos fraccion di AVP ta e hecho cu Prome Minister ta bin Parlamento y e prome cos cu e ta informa Parlamento, ta cu e no por duna Parlamento e documentonan cu a bin for di Hulanda, ya cu e documentonan aki ta informacion secreto.
Ta mas cu claro cu e prome pregunta cu ta lanta den nos cabes, ta kico anto Prome Minister a bin haci Parlamento, caminda el a bin Parlamento pa nos tuma un decision riba nos punto di bista riba e proposicion di Hulanda pero di otro banda Evelyn no ta duna Parlamento e documentonan aki pa nos por sa kico Hulanda ta exigi y kico nos por bay di acuerdo cune of nos no opr bay di acuerdo cune.
Pues sin duna informacion adecuado Prome Minister ta pidi parlamento pa tuma un decision riba un asunto asina delicado y serio, sin cu Parlamento tin nocion di kico ta e exigencianan di Hulanda.
Naturalmente un Parlamento cu ta respeta su mes no por haci esey y den e caso aki, practicamente nos por bisa cu parlamento den su totalidad a informa Prome Minister cu nos mester haya e documentonan aki pa mira y analisa.
Loke nos fraccion di AVP ta diferencia den e asunto aki cu e otro fraccionnan cu ta sostene gobierno, ta e hecho cu e otro fraccionnan kier manda un carta pa Hulanda pa informa Hulanda cu e documentonan aki mester yega Parlamento.
Sinembargo pa fraccion di AVP nos ta bisa cu ta gobierno di Aruba mester duna Parlamento e documentonan aki, pues gobierno di Aruba no por bisa we ta haya documentonan di gobierno Hulandes, riba dje ta bin bisa cu e documentonan ta secreto.
Sinembargo varios ambtenaar rond di Gobierno si a wak e documentonan aki y caminda nos a tuma nota cu hasta den prensa tin cierto periodistanan cu a haya parti di e documentonan aki, anto Parlamento di Aruba cu tin e deber di tuma decisionnan, no ta ser permiti pa mira e documentonan aki.
Asina mes nos por a scucha algun informacion riba algun punto caminda si scucha bon, Ministernan ‘tussen de lippen door’ cu lo tin cierto puntonan cu Hulanda tabata kier pa Parlamento tuma decision riba esakinan.
Algun punto te caminda nos sa di loke ta spera Aruba, ta cu nos pais tin cu acepta un CFT full flesh, pues caminda e ley di CAFT cu nos tabatin cu ta sigura e supervision financiero pa loke ta Aruba y cu tabata mara na un fecha di 2018.
Si e tempo ey gabinete Wever Croes a cumpli cu loke gobierno di AVP a laga atras, awe lo no tin e discucionnan aki riba supervision financiero pero e gobierno nobo a dicidi di conspira pa bisa Hulanda cu gobierno di AVP no a cumpli cu reglanan y a pidi Hulanda pa duna Aruba tres pa cuater aña mas.
Naturalmente Hulanda a duna gabinete Wevr Croes tres pa cuater aña pero awe tur hende por mira e consecuencia di e wega politico cu a wordo hunga na 2017, cu consecuencia cu no solamente CFT ta bay bira permanent, ya cu e ta bay wordo hinca den un Rijkswet loke definitivamente ta nifica cu Aruba ta perde su autonomia financiero.
Fuera di esey, Hulanda kier introduci un ‘consensus Rijkswet’ valido pa Aruba, Corsou y Sint Maarten, caminda lo bay bin un comision cu practicamente ta nifica un gobierno riba e gobiernonan di e tres islanan, cu lo bay e finansa di e paisnan ey.
Prome Minister Evelyn Wever Croes a splica cu ta bay bin un comision cu ambtenaarnan Hulandes, kendenan ta bay dicidi pa e paisnan y pa pais Aruba tambe, con placa lo wordo gasta aki na Aruba.
Esaki ta nifica cu e Ministernan ta keda responsabel pa e begroting, esta e placa pero e Ministernan no por bisa con placa ta bay wordo gasta y na kico por gasta e placa aki,” Parlamentario Benny Sevinger a declara.
