Ta importante pa aclaria declaracionnan duna pa prome minister Evelyne Wever Croes como reaccion riba observacionnan haci pa Parlamentario di fraccion di AVP, Arthur Dowers, relaciona cu un articulo cu a keda publica den medio di comunicacion na Spaña relaciona cu transporte di oro for di Venezuela.
Sr Dowers a mustra cu entre otro premier Wever Croes ta pretende cu a trece e asunto aki dilanti na momento cu tin un situacion delicado cu Venezuela y cu pa e motibo aki sr Dowers lo ta creando problema supuestamente pa su persona.
“Ta bon pa nos ta hopi cla riba e asunto aki, esta pa sra Wever Croes, cu no ta nos a trece e punto aki dilanti ya cu e tema di transporte di oro aki ta un tema cu tin atencion internacional caminda den un publicacion na Spaña, a bin detayadamente riba e transporte di oro for di Venezuela via di Aruba.
Un di e puntonan importante di esaki cu nos a trece dilanti y cual sra Wever Croes no a duna contesta riba esaki, ta cu sra Wever Croes a traiciona pais Aruba ya cu ora presidente Maduro a bin dilanti y bisa cu tin traficacion ilicito di materialnan via di Aruba, prome minister a core brasa Maduro y a keda keto riba e asunto aki.
Recientemente prome minister Wever Croes a sali y pidi tur hende pa resa diadomingo cu a pasa ey y tur esaki despues c’un sostenedo di dje y su partido a publica den medionan social cu palabranan ofensivo den su direccion y di su gobierno, anto e ora prome minister y bin papia cosnan bruha contra nos.
Mi tin cu bisa prome minister pa no bin purba bruha tera ya cu tur hende sa unda e ta para y ami ta un di nan cu no ta interesa den su mentiranan.
E informacion di traficacion di oro a bin dilanti dor di un grupo di prensa internacional, cu a sali despues den prensa local y loke mi a haci ta di mustra riba e hecho cu loke no a wordo poni den e publicacionnan aki, ta cu sra Wver Croes a traiciona pais Aruba na momento cu ela scohe banda di Maduro, na luga di para y mustra Maduro riba e hecho cu e traficacion di oro aki ta tuma luga bou consentimento di gobierno Venezolano.
Esey ta e discusion cu nos a hiba, bo no por bay contra bo mesun pais bisando cu gobierno anterior tabata permiti cierto cosnan djis pa su persona mustra bon y loke mi a bisa ta cu Evelyne Wever Croes tabata sa masha bon di e traficacion di oro aki, pasobra ta su bodyguard tabata envolvi den transporte di oro aki, ta hendenan rond di sra Wever Croes tabata traha hunto den esaki.
Ta hendenan den su gobierno ta esunnan cu tabatin negoshi den trafica oro y mas cu tur cos, e oficina di e compania cu ta transporta oro tabata situa den su edificio di Arulexbuilding cu e mes ta doño di dje.
Prome minister no mester bin haci como si fuera e no tabata sa kico ta pasando e tempo ey pero awor mi a tende bisa cu ta cosnan cu a pasa bou di nos gobierno. El a pasa bou di nos gobierno, el a pasa bou di bo gobierno y si ta un dia of shen dia el a pasa, el a pasa bou di bo gobierno tambe.
Den e publicacion ta wordo mustra cu Prome Minister Evelyne Wever Croes a tuma e decision pa prohibi importacion di koper for di Venezuela pero ningun momento a tuma medida contra di importacion di oro.
Prensa internacional a bisa esaki tambe cu nan mes tabata parti di esaki y na luga di scoge banda di Aruba, sra Wever Croes a dicidi di brasa nan y bisa cu no ta gobierno di Aruba.
Gobierno di Aruba no tin ningun mina di oro, gobierno di Aruba no tin ningun compania di transporte di oro y e unico hende cu tabatin un compania asina tabata su bodyguard y esun cu sa di esaki ta bo persona ya cu nan tabata establece den bo edificio.
Ta bin acerca cu prensa internacional mes ta contradeci ponencianan di prome minister Wever Croes informando cu el a haci cambio pero e no a haci ningun cambio y nan por sigui transporta e oro aki manera nan ta haya ta bon y ki ora cu nan haya ta bon.
Sra Wever Croes ora bo ta papia, sea honesto y papia e berdad cu pueblo y awor e ta bisa cu e kier bay den un debate cu mi persona y mi ta dispuesto pa bay den un debate cune na unda cu ta y ki ora cu ta y si e kier haci na cede di MEP, lo mi bin eynan cu varios MEPista cu el a gaña y kendenan ta harta di su mentiranan y eynan nos lo sinta y esunnan cu el a bisa cu e no conoce cu ta MEP, nos lo sinta y nos lo discuti abiertamente riba e tema aki sra Wever Croes no por sigui sconde.
Ta bo bodyguard para banda di bo persona riba auto ta esun cu tabatin e negoshi y e luga cu e negoshi aki ta registra ta den bo edificio,” Parlamentario Arthur Dowers a declara.
