Informacion riba e racha di mentira di Minister President mr. Evelyn Wever Croes ta locual cu parlamentario mr. drs. Arthur Dowers a trece dilanti awe durante conferencia di prensa di partido AVP. Evelyn Wever a manda un carta indicando cu lo tin un problema interno den partido POR y cu e problema aki lo ta afectando su gobernacion. Un gañamento!
For di dia cu e Gobierno aki a cuminsa tabatin problema den tur e partidonan di coalicion. E gobernacion aki ta forma riba un base di corupcion, basa riba e posibilidad pa comete actonan di corupcion, nepotismo y patronahe. Riba e base aki a wanta na otro y midi forsa y logra sinta eynan pa casi 3 aña caba.
Prome problema a surgi cu Minister Marisol Lopez Tromp den luna di juni
Problema a surgi den partido POR entre Marisol Lopez-Tromp y profesor Andin Bikker (4 di juni, 2020) na momento cu a avis’e cu e lo tin bandona partido. Lopez Tromp cu ta un sociaal wetenschapper, cu ta studia comportacion di hende y interaccion di hende den sociedad y a duna Andin un laba, un strica y un guma, pa locual ta trata ley. El a duna Bikker un les di con nos ley y constitucion ta funciona mirando cu e no ni sa con e propio statuut di su partido ta hinca den otro.
Enbes di bandona partido y bandona gobierno, Lopez Tromp a manda Bikker bay sinta un banda mientras el a keda boft’e for di e dia ey te cu siman pasa. Adicional a cuminsa bofta e otro ministernan tambe entre otro Dangui Oduber como tambe Chris Romero mustrando riba nan comportacion cu no ta adecuado ni integro.
Si un Minister tin cu sali di pafo y drenta bo gobierno y bisa cu bo comportacion no ta integro y coleganan no ta integro, anto tin un problema serio cual no ta un problema cu a nace dia e persona a bin den bo gobernacion. Marisol Lopez Tromp a sostene bagamundria for di parlamento y na momento cu a drenta bo gobernacion, a bay contra di boso, ta locual parlamentario Arthur Dowers a bisa.
Aki situacion a cuminsa y escala
Un di e prome actonan di ex mandatario Oduber tabata un atake na e keurings lokaal, cu tabata un acto di nepotismo y patronahe abierto, caminda tur hende den parlamento incluyendo Marisol Lopez Tromp y esnan di MEP y POR a acepta y a bendiciona esaki.
Momento cu Minister President a informa di a ricibi un carta di Howell (POR) cu nan no ta sostene Marisol Lopez Tromp mas, cual ta masha humoristico mes pasobra a puntra Howell den prensa y aki a informa di no ta na altura y no sa kico ta pasando y no por duna comentario.
Wever a expresa cu den conseho di Minister, hunto cu e Ministernan cu tabata den confrontacion cu Lopez Tromp, nan lo a dicidi cu ta basta y den ministerraad nan lo bay kita su cartera for di dje. Cual pa ley no ta posibel. Cartera cu ta supone tin cu cay awo bou di Minister Glenbert Croes mientras Lopez Tromp ta di viaje.
Tur ta actonan di desesperacion basa riba corupcion
Wever Croes ta garantisa cu tur investigacion ta bay sigui, MENTIRA! Dowers ta enfatisa cu ni e investigacion cu mester a cuminsa di un comienso no a tuma luga. E tabata responsabel y mirando cu Lopez Tromp tabata sostene Oduber (POR) den parlamento cu na su turno a tuma over e cartera di Otmar pa algun luna y ningun momento a cuminsa un investigacion. Si acaso tabata e intencion, a haya e oportunidad y no a haci nada. Mucho menso awo cu tin varios investigacion andando ta sigur cu no ta bay garantisa cu ningun investigacion nobo ta bay sigui.
Arthur Dowers no ta mira un Evelyn Wever Croes ta bay garantisa ningun tipo di investigacion contra Otmar Oduber ni contra su mesun gobierno of otro Ministernan, e bay gaña baca. Niun hende ta kere e cos ey ta bay pasa.
Problema actual no ta un problema interno di partido POR, Marisol Lopez Tromp ta forma parti di e gobierno di Evelyn Wever Croes, caminda e ta bezig ta ruim op e rotzooi di gobierno Wever Croes, no ta problema di POR. Niun hende cu ta bou investigacion ta traha pa partido POR pero mas bien tur ta trahando pa gobierno Wever Croes y asina crea un problema di e gobierno actual. Si acaso tabata problema di Partido POR anto no mester a yama comision cu representante di tur partido den coalicion pa bay busca solucion, ta kens el a kere cu tur hende ta, ta locual cu Dowers a expresa.
No por manda un representante di MEP, RED y abogado Swaen pa bay soluciona problema interno den partido POR caminda cu su persona no tin autoridad y caminda corupcion ta rementa den cara mirando cu ta patronahe, nepotismo y compra di accion den partido politico a pone cu e coalicion a forma y ta na mando awe.
