Ta sumamente importante pa señala algun punto importante relaciona cu e ley di ‘crisisheffing’ cu gobierno a presenta na Parlamento pa wordo trata e siman aki y lider di fraccion di AVP, sr Marlon Sneek ta mustra cu ta un ley caminda gobierno ta bay pone medida oficial riba pueblo.

Un di e puntonan cu mas ta resalta tin di haber cu nos pensionadonan ya cu nos tur por corda con partido MEP durante di campaña a reparti un pamfleta sigurando cu nan lo baha e AZV pa pensionadonan pero awor por mira cu esaki ta un mentira fragante.

Algo di lamenta sigur ora c’un partido pone den su programa di campaña como prome punto ora cu MEP drenta gobierno, ta di eherce bon gobernacion pero na luga di esaki, MEP ta cuminsa pa gaña pensionadonan, sigur ora cu nos tuma nota cu den e ley cu a wordo presenta riba pagina 11, por lesa caminda ta intencion cu entrante prome di januari 2019, un grupo grandi di pensionadonan lo no ricibi e ‘reparatietoeslag’ cu nan ta cobrando pa algun tempo caba.

Pues di un banda gobierno ta kere cu e ta haci pensionadonan feliz cu reduciendo nan pago na prima di AZV cu 100 florin pero ta mal informando e grupo aki ya cu di otro banda ta bira ranca e suma di 100 florin cu e pensionadonan ta hayando na e momentonan aki como reparatietoeslag.

Parlamentario Sneek a sigui mustra cu e maniobra y manipulacion aki no ta cuadra c’un gobierno cu a priminti di hiba un gobernacion a base di transparencia y bon gobernacion, pero ta manipulando e opinion di pueblo cu e tipo di maniobranan aki, caminda  gobierno ta pretende di lo yuda pensionadonan cu reduccion di prima di AZV cu nan tin cu paga cu 100 florin, pero no tin e curashi di bisa e mesun pensionadonan aki, cu den e ley cu ta bay wordo trata e siman  aki, lo tuma e decision cu nan lo no ricibi e reparatietoeslag di 100 florin cu nan a bin ta  cobrando pa algun tempo caba.

El a sigui mustra cu hopi cos ta bay cambia den su totalidad na momento cu e ley di aumento di BBO y BAZV pasa den Parlamento caminda entre otro por spera mas aumento di gasolin cu ya caba hopi hende ta sinti e efecto cu aumento di accijns y di prijs internacional, ya cu introduccion di BBO lo percura sigur pa un serie adicional di aumento di prijs di gasolin den proximo lunanan.

Ta practicamente sigur cu Aruba lo bay conoce un inflacion di riba 10%  ya cu fuera di prijsnan di tur producto lo subi cu e ley aki, pueblo por spera tambe un aumento riba tarifa di awa y coriente, Parlamentario Marlon Sneek ta declara.