Manera custumber despues di apertura di Aña Parlamentario, un di e prome reunionan cu ta wordo yama ta pa stipula e miembrecia y presidencia di e comisionan fiho y special di Parlamento. Conforme proposicion di partidonan den coalicion, AVP no a wordo otorga ningun presidencia ni vice-presidencia den e comisionan ariba menciona. “Awe ta un dia scur pa nos democracia unda nos ta wak cu partidonan den coalicion ta mina nos estado di derecho tratando di silencia e partido cu a sali ganador di e ultimo eleccion,” Parlamentario Sr. Richard Arends a declara na final di e reunion publico.
Como presidente di e comisionan fiho y special, un parlamentario tin e prerogativa di yama reunionan, invita ministernan of otro instancianan pa discuti riba contenido di areanan di maneho. Partidonan MEP y AVP tin e mesun cantidad di asiento y segun e proporcion aki ambos partidonan lo mester presidi e riba mesun cantidad di comisionan. “E reparticion cu a wordo aproba awe pa mayoria den Parlamento no ta refleha e composicion di parlamento despues e ultimo eleccion, pero ta basa riba e strategia partidista,” Parlamentario Arends a sigui bisa.
Parlamento conoce 15 comision fiho y 5 comision special. Mester remarca cu durante aña Parlamentario anterior a dicidi caba cu solamente dos comision fiho lo wordo presidi pa miembronan di fraccion AVP. Durante aña parlamentario 2017-2018, Parlamentarionan Richard Arends y Robert Candelaria tabata respectivamente presidentenan di e Comision Fiho di Companianan Estatal y Utilidad y di e Comision Fiho di Transporte y Comunicacion. Ademas Sr. Arends tabata vice-presidente di e Comision Fiho di Finansas Publico y Asuntonan Economico y Sr. Lampe di e Comision Fiho di Deporte y Cultura. Cu e reparticion aproba awe ambos Parlamentario a wordo destitui.
Ta hala nos atencion cu e partido mas grandi di coalicion di un manera prepotente tabata propone cua parlamentarionan di oposicion mester a forma parti di e diferente comisionan y por a sinti cu a purba di tur manera pa Sr. Arends keda cu ningun presidencia. Den pasado no tabata inusual cu miembronan di oposicion tabata encarga cu presidencia di diferente comisionan fiho, por ehempel Sr. Andin Bikker tabata presidente di e comision fiho encarga cu companianan estatal. “E politica nobo y di nivel cu tanto a wordo prometi door di miembronan cu ta sostene e coalicion a keda na palabra so,” e Parlamentario a finalisa bisando.
