Miembro di fraccion di AVP, sra Jennifer Arends Reyes a efectua un bishita di cortesia na CMD caminda tin un inquetud grandi bou di personal di e departamento, despues cu nan a ricibi un carta for di gobierno relaciona cu nan trabou.

“Nos a wordo notifica cu personal di MDC ta bibando den hopi incertidumbre pa loke ta nan trabou den e centro sin cu tin mucho claridad tras di e motibo di e decision aki.

Tin diferente punto di atencion cu nos lo bay trata durante e proximo reunion di Parlamento pa loke ta presupuesto 2018 pa haya mas claridad riba ta e maneho di gobierno pa cu e centro aki.

Diferente decision a wordo tuma relaciona cu maneho di e centro pero ningun caminda trahadonan por haya claridad riba e motibo di e decisionnan aki y kico esaki ta nifica pa futuro di e centro.

Despues cu e trahadonan a bin ta laborando den e centro pa algun aña caba, nan a wordo sorprendi pa un carta di gobierno den cual ta wordo informa riba diferente decision cu a wordo tuma pero e splicacion riba e motibo tras di e decisionnan aki, no ta algo concreto ainda pa e trahadonan aki.

Na mes momento mester bay wak awor kico ta bay pasa cu e parti di ‘kluster 4’ di e centro aki caminda awor un grupo di muchanan chikito lo ser aloca den un spelkamer cu no ta adecuado pa e muchanan aki.

Mi ta kere cu esey ta un di e preocupacionnan mas grandi di e trahadonan y na mes momento a ser mustra cu no tin suficiente personal pa sigui cu e trabounan di e centro multi disciplinario di Aruba,”  Parlamentario Jennifer Arends Reyes a mustra.