Parlamentario Candelaria a sigui mustra cu pa loke ta Arubadag di 2019, riba 10 di juli 2019, pues casi 2 aña pasa AVP a haci un serie di pregunta na Prome Minister kende ta politicamente responsabel pa e minister plenipotenciario na Den Haag relaciona cu e organisacion di Arubadag.
“Entre otro algun di e preguntanan tabata, kiko tabata e suma total di e organisacion di Arubadag 2019 y e tabata budgetneutraal manera minister plenipotenciario a bisa e tempo ey?
Tambe nos a pidi den e carta un relato financiero di Arubadag di e anja ey y nos a puntra si tur e gastonan pa cu e organisacion di Arubadag 2019 a wordo paga y cua organisacion tabata encarga cu organisacion di e dia? Lamentablemente te dia di awe Candelaria a indica cu no a ricibi contesta riba e preguntanan, manera ta custumber di e gobierno aki.
Candelaria a bisa cu ta bolbe haci pregunta na Prome Minister riba e topico aki pa loke ta Arubadag 2021 pasobra nan tin entendi cu Minister Plenipotenciario a anuncia recientemente cu e aña aki lo tin un Arubadag virtual y cu un enfoke diferente pa duna cos na hende cu ta menos afortuna den nos comunidad.
Si esey ta asina, e ta zona manera un gesto noble, pasobra aki naAruba tin rond di 30 mil hende cu ta depende di yudansa pa cosnan basico manera cuminda y hopi hende su awa y coriente ta wordo corta y nan no tin placa pa habri esakinan bek y nan no ta recibi yudansa di gobierno den esaki.
Si e idea ta pa yuda e hendenan aki, nos ta aplaudi e idea y teniendo cuenta cu e situacion precario di nos finansas, nos ta sali di e punto di bista cu ta imposible cu e Arubadag aki lo costa pais Aruba placa pa organisa. A para carnaval y hopi otro fiesta e aña aki caba. Pa cu e actividad mes, nos a compronde cu e orario di e programa lo ta di 6-12 PM. Nos ta puntra si no a opta pa haci’e un orario mas tempran mirando cu hopi famia na Hulanda lo kier sigui e actividad y nan tin di traha e dia siguiente.
Nos ta asumi cu e idea ta pa esnan na Hulanda tambe disfruta di nos dia nacional y 35 aña Status Aparte y tambe contribui cu e causa. Ta un aña dificil pa Aruba y pa e motibo ey nos kier un bista riba e gastonan pa cu e organisacion y AVP kier sa si tur e bandanan participando lo ta na Aruba, of na Hulanda. Mirando cu ta trata di un fundraising event, e bandanan lo haci esaki gratuitamente of si tin gastonan tog envolvi, cuanto esakinan ta? Tambe ta puntra na cua canal di TV lo pasa e actividad? Lo ta manera e actividad di recauda fondo di Jandino, Robert Candelaria, miembro di fraccion di AVP a declara.
Den conferencia di prensa di fraccion di AVP tambe Parlamentario Robert Candelaria a lansa otro preguntanan pa cu Arubahuis y tambe vivienda di e Minister Plenipotenciario y Arubadag 2021.
“Nos tin entendi cu e Minister Plenipotenciario no ta biba den e cas asigna p’e na Hulanda y tal bes tin motibo valido pa esaki pero e ta nifica si cu tin un cas bashi y un cas unda si e ta bibando cu mester wordo paga.
Si e minister no ta biba den e ‘ambtswoning’ pa cualkier motibo valido, nos ta pensa ta bon pa splica pueblo cua e motibonan aki ta y con a resolve e asunto aki di vivienda actual pa Minister aya na Den Haag?
Ken ta paga e cas unda Minister Plenipotenciario ta biba awor, mirando cu tin 2 cas pa su persona, loke sin duda ta un luho cu no mester den e temponan aki. E preguntanan aki ta hopi importante awor den un tempo hopi dificil pa Aruba, caminda no por gasta niun florin sin motibonan realmente valido. Tur hende cu ta traha pa gobierno aya na Hulanda, tambe mester corda cu pronto e gobierno aki lo bay cas y no mester kima bo dede, pasobra bo mes lo para responsabel pe,” Parlamentario Robert Candelaria a mustra.
