Diadomingo, 17 di Maart, a tuma luga ponemento di krans y homenahe na Monumento 18 di Maart, caminda cu un publico basta grandi, como tambe miembronan di fraccion di AVP, y lider di AVP a haci acto di presencia. Lider di AVP, Mike Eman a bisa den su discurso cu para na e Monumento, na pia di e luchadornan, di su tata y e 2147 firmantenan, cu hopi biaha tambe para na estatua di Betico Croes, mirando e yiunan di Betico, no mirando color politico, pero mirando trayectoria di lucha, mirando sacrificio cu e lidernan aki a haci pa nos pais.

Eman semper a pensa cu hopi por ta, no ta realisa cu e balor cu nos pueblo ta duna na nos lidernan, e amor cu nan ta keda comparti hopi aña despues cu nan no ta cu nos mas, ta duna famianan un sosten hopi grandi. E bashi di perdida di un tata na edad hoben, ta algo cu ta keda biba cubo pa añanan y pa semper.

Cada bes cu bo topa un Arubiano, un ciudadano di nos pais cu ta bisabo kico bo tata a nifica pa nan. Con el a inspira nan, of con el a yuda nan, of con el a cana cu nan, na momentonan dificil, na momentonan di alegria, e ta yena un pida di e bashi cu ta keda na momento di dispidida inespera.

E ta conta pa e famia di Shon A. Eman, pero e ta conta tambe pa tur esnan cu tabata tey na e monumento, cu tambe ta yiu, nieto, bisanieto di firmantenan cu a carga e lucha pa Aruba.

Sigur un momento hopi emotivo, pa un y tur presente. Tabata tin ponemento di krans y tambe un relato di esnan cu a firma pa Aruba haya su status aparte for di Hulanda asina tanto tempo pasa. E candela cu por a wordo paga, ta cendi den un y tur y semper e tabata cendi den tur e persona y ciudadanonan na Aruba, den historia y te awe. Si nan no a tuma lucha, balentia di papia, comparti y firma pa nos yega unda nos ta awe, nos no lo ta un Aruba di awe. 

Esey tin cu duna nos e forsa, e guia, pa nos tambe sigui cu e lucha. E candela ta cendi den un y tur y hamas y nunca e lo paga, tanten cu ta den union, cu tin forsa y tin perseverancia, y cu ta kere den un miho Aruba, pa nos hobennan, pa nos muchanan, pa nos grandinan, pa tur cu ta biba na e pais aki.