Awe Cuerpo Policial Aruba ta celebra su di 32 aña di existencia como un cuerpo independiente. Ta haci esaki specificamente riba “Dia di Polis”, of tambe yama na Hulandes “Korps Dag”. E dia a habri awe cu un Santo Sacrificio di Misa na Dakota, den cual Parlamentario Robert Candelaria tambe tabata presente. “Tabata un placer awe sinta cu mi ex coleganan pa e celebracion di awe. Ta importante para un rato keto riba e dia special, riba e trabou cu 600 homber y muhenan balente ta desplega tur dia bay como Polis”, asina Robert Candelaria a duna di conoce awe despues di e ceremonia oficial.

El a subraya cu e trabou di Polis ta pa mantencion di orden publico y pa haci investigacionnan penal. “Un trabou masha dificil pasobra asina Bo cuminsa cu un investigacion, Bo nunca sa kico lo pasa ni unda e investigacion lo bay caba, pero como Polis bo ta haci’e cu pasion pa sirbi comunidad”, asina e ex Alto Inspector di Polis a splica. Mas leu el a indica cu den e trabou dificil aki, ora cu tin peliger y cu tur hende ta core for di dje, abo ta esun yama pa haya Bo den dje. Tambe un aspecto di e trabou ta e integridad necesario pa ta un Polis, cu por consola un persona den su dolor y na otro momento por actua contra e mesun persona aki si ta necesario.

“Pesey mi ta felicita tur mi ex coleganan, deseando nan tur hopi forsa, sigui haci loke ta corecto, keda cana riba e caminda corecto, traha di acuerdo cu nos leynan. “E ta hopi dificil, pero no imposibel. Ora Bo para un rato keto y refleha kico tur bo a logra, ta duna Bo un sentido di placer den Bo curason”, asina Robert Candelaria a termina bisando.