Diasabra ultimo, dia 15 di september Plataforma pa Hobennan Profesional (PHP) a inaugura nan Tienda di Ley. Despues di e inauguracion official hunto cu lider di partido señor Mike Eman, a bai over na atende e personanan cu a yega Cas di Partido AVP cu nan preocupacion. Meta principal di e Plataforma aki ta pa brinda diferente servicio den un forma gratuito na e comunidad. Den varios caso e personanan tin algun duda of inkietud pero no tin acceso na e ayudo necesario. Banda di e aspecto huridico lo tin algun servicio adicional cu PHP lo ta brindando.
PHP ta ofrece asistencia den traha curriculum vitae (CV), resumés y cartanan di solicitud. Na momento cu un persona bai aplica pa un trabou, nan mester entrega un CV acompaña pa un carta di solicitud. Ta importante pa tin esakinan bon structura mirando cu den mayoria caso esaki ta e prome impresion cu e dunador di trabou lo haña di e persona.
Despues di e conversacion pa haña tur informacion necesario di e persona, e miembronan di PHP lo traha riba e CV, resuméy carta di solicitud.
Tambe, si ta necesario PHP lo yuda cu aplicacion pa trabou online. Den e ultimo añanan hopi compania ta pone nan vacaturanan riba rednan social y tambe nan website. Mirando cu no ta tur hende tin acceso na esaki, PHP ta ofrece pa asisti nan pa busca un vacatura cu ta pas cu locual nan ta buscando. Miembronan di PHP ta keda cu bista riba diferente di e paginanan cu ta pone vacatura riba medionan social pa asina posiblemente duna e ciudadano un opcion of idea den ki rumbo lo ta bon pa e solicita.
Hecho ta cu Aruba ta un pais multilingual y den cierto casonan e lenguaje ta un barera. Pa es motibo PHP ta wak e importancia den asisti cu interpretacion di documentonan oficial. Ta trata aki di documentonan ricibi di instancianan gubermental of otro instancianan. Ofreciendo e servicio aki e cuidadano por ta bon informa di kico ta wordo informa na su persona. Den otro caso e documento ta rekeri algun accion di e cuidadano cu mester wordo tuma den cierto tempo. Den casonan asina e ta mas importante ainda cu e ciudadano ta compronde kico e mester hasi pa asina e por cumpli cu e fecha stipula den e documento.
Invitacion general ta bai na tur ciudadano cu lo tin e deseo di wordo yuda of tin cualkier pregunta pa asisti na e Tienda di Ley cu lo sigi dia 22 di september pa 2 pm – 4 pm na Cas di Partido AVP na Playa. Tambe e invitacion ta bai na tur profesional of studiantenan cu lo desea di yuda Plataforma cu e servicio comunitario aki.
