E periodo di proeftijd ta brinda e posibilidad na e trahador y doño di trabou pa conoce otro prome cu nan compromete nan mes na un acuerdo laboral pa termino largo den futuro. Por bisa cu e meta di proeftijd ta pa tanto e trahador y doño di trabou den un periodo no mas cu dos luna sera conoci cu por ehempel e ambiente di trabou, nivel, responsabilidad y capacidad pa cu ehercemento di e trabou. Si den e tempo aki sea e trahador of e doño di trabou no ta satisfecho cu e trabou eherci of simplemente no kier continua eherciendo e funcion e por termina e relacion di trabou sin ningun contratiempo. Durante e temporada aki ambos partido tin e competencia pa termina e acuerdo laboral di forma inmediato tanten e periodo di dos luna no wordo surpasa (articulo 7a:1615n inciso 1)

Articulo 7a:1613u inciso 1 ta prescribi entre otro cu e tempo di prueba ‘proeftijd’ acorda entre trahador y doño di trabou ta igual pa ambos partido. Adicionalmente mester tene na cuenta cu e proeftijd mester wordo hasi por escrito. Cualkier periodo cu ta pasa di e periodo determina aki ta nulo. Por ehempel den un scenario cu un doño di trabou pone den su contract cu e proeftijd lo bai dura 3 luna, esaki automaticamente no ta valido y ta empugna cu loke ley ta prescribi.

Ta importante pa remarca cu doctrina ta indica cierto scenarionan unda cu un clausula di proeftijd ta wordo considera nulo. Por ehempel, un clausula di proeftijd den un segundo acuerdo laboral cu ta sigui despues di e promer ta invalido. Tambe den un caso unda cu un doño di trabou ta wordo considera como un ‘rechtsopvolger’di e dunador di trabou anterior un proeftijd nobo ta nulo. Sin exclui e scenario unda cu ta bolbe pone un proeftijd den un acuerdo laboral despues cu ya caba e trahador a hasi mesun tipo di trabou como un ‘uitzendkracht’. Den e caso aki tambe e clausula di proeftijd ta uno invalido. Segun Corte di casacion ora cu un trahador sera un acuerdo laboral nobo pa eherce e mesun tipo di trabou despues cu ya caba e la hasi esaki via un uitzendbureau, un clausula nobo di proeftijd lo ta contra di e esencia di e ley. Corte di casacion ta pone enfasis riba e hecho cu e doño di trabou ya a haña e oportunidad di evalua e manera di traha y capacidad di e trahador cu un periodo di prueba nobo no lo ta hustifica.

PHP kier enfatisa cu tur articulo cu wordo publica ta cu e meta di informa e ciudadano di nos leynan. Cada caso ta depende di nan circumstancianan concreto. PHP ta trata na aplica e palabranan mas adecua na Papiamento ora di referi na e leynan of hurisprudencia ya cu esakinan ta den idioma Hulandes.  E no ta e intencion di PHP pa reemplasa ningun profesional cu ta defende nan clientenan den corte, sino pa e ciudadano tin un poco conocimento basico di nos leynan y su derechonan. Si e ciudadano ta sinti cu su caso ta uno cu kizas a bai demasiado leu of ta uno cu mester di accion inmediato nos ta recomenda pa acudi serca un hurista of su abogado di preferencia. Plataforma Hobennan Profesional ta invita tur ciudadano cu pregunta of cu kizas ta desea di haya conseho pa bishita e Tienda di Ley cu ta activo diasabra di 2’or pa 4’or atardi, na cas di partido AVP na Playa