Ta probabel cu tin e pensamento cu un homber lo ta obliga di cria su yiu solamente ora e reconoce of tin gezag di su yiu. En realidad esaki no ta corecto. Den e articulo informativo aki nos lo trata na splica esaki. Nos kier avisa na nos lectornan cu de bes en cuando nos a usa palabranan na Hulandes debi cu no tin e palabra apropia den Papiamento. Nos leynan ta stipula den art. 1: 394 BWA cu e ‘verwekker’ di un mucha tin un obligacion pa cumpli cu gastonan di cuido y criansa di e mucha. E ‘verwekker’ ta e tata biologico di un mucha cu no tin un laso huridico familiar cu su yiu. Adicionalmente e obligacion ta encera percura pa costonan di subsistencia y gastonan di educacion te ora cu e yiu cumpli su 21 aña, conforme art. 1:395A BWA.
Descendencia
Descendencia ta e laso cu ta wordo crea entre e hende homber , hende muher y e yiu door di su nacimento. Nos por papia di paternidad biologico y paternidad huridico. Tambe den comunidad por papia di un paternidad social cual mas tanto kiermeen e persona cu a lanta un mucha. E tata biologico ta e persona cu pa medio di forma natural a procrea e mucha cu e hende muher. E ‘verwekker’ di un mucha semper ta e mayor biologico, pero e mayor biologico no tur ora ta e ‘verwekker’ (kinan por pensa riba un donante di e material genetico) E ‘verwekker’ di un mucha tambe ta obliga pa cumpli cu alimentacion na un yiu.
Nos codigo civil ta stipula ken ta wordo considera como e mayornan huridico di un mucha. E mama di un mucha ta e muher cu ta duna luz na e yiu. Esaki ta crea un laso familiar huridico entre mama y yiu conforme art.1:198 BWA. Na Hulanda un hende muher por ta mama den contexto huridico den diferente otro scenarionan, pero esaki nos a laga afor di e articulo aki ya cu nan no ta aplicabel pa Aruba.
Art. 1:199 BWA ta determina ken ta tata di un mucha. Tata di un mucha ta e hende homber cu na momento di nacimento di e mucha ta casa cu e hende muher cu a duna parto, e homber cu reconoce e mucha , e homber cual su paternidad a wordo determina door di corte of e hende homber cu adopta un mucha. Esaki kiermeen cu un mucha cu nace den un matrimonio automaticamente tin dos mayor pa ley.
Den un scenario cu e mucha nace for di un relacion afectivo esaki lo no ta e caso y lo tin solamente e mama como mayor pa ley. E homber lo mester reconoce e mucha pa e por bira tata pa ley cu aprobacion di e mama. Si e mama nenga di duna su aprobacion e tata por pidi un autorisacion via corte pa por reconoce e mucha. Den caso cu e mama kier pa e homber reconoce e mucha y na su lugar e homber ta nenga ta posibel pa por bai corte pa tuma un decision riba esaki.
Obligacion pa duna alimentacion na un yiu
Manera nos a indica caba e ‘verwekker’ di un mucha ta e tata biologico di un mucha cu no tin un laso huridico familiar cu su yiu. No ta relevante si den e caso aki tin of no un relacion amoroso entre e hende homber y e hende muher. Si e mucha tin solamente un mama pa ley y no tin un tata den contexto huridico lo nifica cu e ‘verwekker’ di e mucha ta responsabel y tin e obligacion pa cria (duna alimentacion na un yiu) na e mucha como sifuera e ta su mayor pa ley. E obligacion aki ta wordo prescribi pe medio di art. 1:394 BWA. Si e mucha despues wordo reconoci pa un otro hende homber e obligacion di duna alimentacion na un yiulo termina pa e ‘verwekker’, esaki ta loke Corte di cassacion a dicidi den pasado. Loke si mester tene na consideracion ta e excepcion riba e regla principal aki cu nos a caba di menciona (e obligacion di e verwekker lo caba ora cu e yiu wordo reconoci door di un otro hende homber). Door di Corte Europeo pa derechonan di ser humano a wordo determina cu e obligacion pa sigui paga alimentacion na un yiupor continua den un situacion specifico. Segun Corte Europeo articulo 8 di e tratado Europeo di derechonan di ser humano (EVRM) ta pone un obligacion positivo pa e mucha keda cu su derecho riba alimentacion si encaso e hende homber cu a reconoce e mucha lo no tin e capacidad financiero pa mantene e mucha. Esaki ta nifica cu e ‘verwekker’ lo keda responsabel pa duna alimentacion na un yiu.
Tienda di Ley ta spera cu e serie di articulonan tocante derecho familiar ta na agrado di comunidad. Den e articulo aki nos a dedica e atencion na e obligacion di cria un mucha. Tienda di Ley kier recorda na ciudadanonan cu e meta ta pa informa den liñeanan grandi over e topico. Si acaso bo tin pregunta of duda, semper bo por aserca un abogado of hurista pa mas splicacion den detayes. E ta posibel tambe pa acudi tur diasabra di 3 pm -5 pm na cas di partido AVPna playa . Pa nos colaboradornan y huristanan den formacion e ta un placer di por atende e publico cu ta asistiendo tur diasabra.
(Autor: Gerick Croes & co-autor Wendrick Cicilia, studiantenan di ley)
