Un trahado por wordo confronta cu e situacion unda cu e ta wordo retira inmediatamente pa causa di un motibo urgente (dringende reden). Esaki por tin como consecuencia cu e relacion laboral entre dunador di trabou y trahado ta termina al instante. Ta importante pa e dunador di trabou ta na altura cu tin leynan cu ta aplicabel riba e scenarionan aki. PHP a tuma nota cu retiro ‘op staande voet’ ta sosode cu hopi frecuencia. Pa e motibo aki, nos lo elabora den liñanan grandi tocante e topico en cuestion.
Na momento cu e dunador di trabou termina e relacion laboral cu su trahador al instante, esaki por tin consecuencia devastador pa e trahado. E trahado por keda den un posicion vulnerabel financieramente y cu stress emocional. Pa e motibo aki, retiro a causa di un motibo urgente ta regla den ley. Articulo 7A:1615O inciso 1 di nos codigo civil ta menciona tres criteria importante. Principalmente mester tin:
- Un motibo urgente (dringende reden) pa retira e trahado;
- E trahado concerni, mester wordo avisa dibiahatocante e motibo di retiro;
- E retiro mester sosode di forma inmediato.
Un motibo urgente (dringende reden) pa retira e trahador.
Un motibo urgente (dringende reden) den sentido di articulo 7A:1615 P, ta un accion,cualidad of conducta di e trahador, cu tin como consecuencia cu no por exigi di e dunador di trabou pa continua e relacion laboral. Articulo 7A:1615P inciso 2 ta menciona un lista no limitativo di motibonan urgente cu por resulta den un retiro al instante.
Motibonan cu por wordo considera urgente segun ley ta entre otro:
- na momento cu un trahado maltrata su coleganan of dunador di trabou;
- na momento cu un trahado descuida su obligacionan laboral na un manera inaceptabel;
- na momento cu e trahado hasi su mes culpabel di ladronicia na pia di trabou;
- na momento cu un trahado intencionalmente ta expone su mes y otro nan na peliger na pia di trabou;
- Na momento cu e trahador no ta apto pa, ni capacita pa eherce su trabou.
Tur e loke nos a cabi menciona por wordo considera como motibonan urgente pa retira e trahado inmediatamente. Nos kier enfatisa cu e circumstancianan specifico di e caso ta determina si tin un motibo urgente pa retira e trahado inmediatamente.
E trahado concerni, mester wordo avisa dibiaha tocante e motibo di retiro
E dunador di trabou ta obliga pa avisa e trahado tocante e motibo di su retiro al instante. Esaki por sosode verbalmente of por escrito(por ehempel un carta formal). Si esaki sosode por escrito, e carta mester ta di tal manera formula cu e trahado por compronde kiko te motibo pa su retiro inmediato. Esaki ta duna e trahado e oportunidad pa por evalua si locual e ta wordo acusa di dje ta corecto. Ta importante pa e dunador di trabou ta conciente cu unabes e avisa e trahador tocante e motibo di su retiro al instante, esaki no por wordo ahusta of añadi mas motibo.
E retiro mester sosode inmediatamente.
Dunador di trabou mester retira e trahador inmediatamente, despues di e incidente of accion di e trahador. Si e dunador di trabou laga dia(nan) transcuri esaki por duna un indicacion cu e motibo no ta urgente. Den bista di Corte di casacion e ta aceptabel cu e dunador di trabou por tuma algun dia pa hasi e investigacionnan necesario of adkeri conseho huridico pa asina e por tuma un decision responsabel y correcto .
Otro factornan determinante relaciona cu retiro ‘op staande voet’
Den e caso Hema, Corte Supremo a subraya cu tin otro aspectonan cualnan tambe mester wordo tuma bou consideracion ora ta trata di un retiro op staande voet. ‘Pa evalua e pregunta si por papia di un motibo urgente pa retiro inmediato mester considera e circumstancianan di e caso en combinacion cu circumstancianan personal. Bou di e circumstancianan personal aki por cai entre otro e persona su edad y e consecuencianan cu e retiro por tin pa e trahado (por ehempel consecuencianan financiero) ‘
Plataforma pa Hobennan Professional (PHP) ta spera di por a informa e dunador di trabou y trahado un poco mas tocante e tema aki. Den nos comunidad ‘retiro op staande voet’ ta sosode cu demasiado frecuencia. E dunador di trabou mester ta mas cauteloso na momento di retira su trahador inmediatamente a causa di un motibo urgente. Den ley tin tres criteria ankra cu e dunador di trabou mester tene na cuenta prome cu tuma e decision pa retira e trahador inmediatamente a causa di un motibo urgente ( dringende reden). Si acaso e criteria nan menciona no wordo teni na cuenta, esaki tin consequencia legal pa e dunador di trabou. Logicamente cada caso ta depende di nan circumstancianan specific. Ta recomendabel pa tur dunador di trabou pa busca conseho huridico prome cu tuma e decision drastico di retira e trahador al instante. PHP kier recorda comunidad cu tey tur diasabra na Cas di Partido AVP pa informa pueblo tocante temanan manera esaki y hopi mas.
Scirbi pa:
Studiantenan 3er aña di Facultad di Derecho na Universidad di Aruba
Autor: Wendrick Cicilia
Co-autor: Gerick Croes
