Re-unificacion familiar ta nifica cu un miembro di famia kende ta permanece legalmente na Aruba lo reuni huntu cu un of mas miembro di famia for di un pais di origen of di cualkier otro pais. Bou di miembro di famia nos ta compronde solamente casa y of tambe yiunan menor di 18 aña. Crucial ta cu e relacion di famia a inicia (matrimonio/nacimento) prome cu e partner of mayor a establece su mes na Aruba.

Pa por biba na Aruba huntu cu bo esposa/esposo of hunto cu bo tata/mama, bo mester di un permiso di estadia. Aruba su ley di admision conoce cuatro situacion bou di cual re-unificacion ta posibel:

Situacion #1

Re-unificacion di miembronan di famia cu persona principal biba na Aruba cu ta cai bou di articulo 1A of B LTUV of persona cu ta admisibel pa ley, conforme articulo 3 LTUV. Miembronan di famia a base di esaki tambe ta admisibel pa ley (van rechtswege toegelaten).

Esaki ta a base di nos Landverordening Toelating, Uitzetting en Verwijdering (LTUV). Nan ta:

Articulo 1:

E regulacion den e articulonan 2 te ku 23 inciso 2 no ta aplicabel pa:

a: hulandesnan naci na Aruba of naturalisa na Aruba;

b: hulandesnan ku for di 1 januari 1986 sin interupcion ta residente di Aruba;

c: hulandesnan cu no a nace na Aruba for di cua al menos un di e mayornan ta pertenece of a fayece y prome cu e fayecimiento tabata forma parti di un di e categorianan menciona den A of B.

Articulo 3:

Esnan cu tin admision a base di ley pa permanece na Aruba ta:

a: personanan cu ta den servicio di un di e paisnan den reino of a base di un decreto estatal cu ta contene medidanan general (landsbesluit houdende algemene maatregelen) apunta un pais of di un organisacion internacional;

b: personanan cu tabata den servicio di pais Aruba of cu prome cu 1 januari 1986 tabata den servicio di pais Antianan Hulandes of teritorio insular di Aruba y cu for di esaki ta ricibi un pensioen of un compensacion den forma di pensioen y tambe e viuda di e personanan menciona cu no a bolbe drenta enlace matrimonial;

c: personanan cu na Aruba ta admisibel como consul profesional, empleadonan como profesion cu ta traha den un consulado y tambe otro empleadonan di e consulado;

d: militarnan durante di e temporada cu nan ta staciona na Aruba;

e: tripulantenan di armada naval of fuersa aerea di cualke poder durante di e tempo cu nan ta na Aruba y ta dispone di un permiso di e autoridad competente;

f: hulandesnan cu durante di un periodo di mas cu cinco aña sin interupcion na Aruba a ser admiti a base di ley (van rechtswege toegelaten) of a base di un permiso.

Situacion #2

Re-unificacion cu e persona principal na Aruba cu tin un permiso di estadia pa tempu indefinitambe ta posibel. Tene na cuenta si cu den un caso asina, e miembronan di famia por ricibi un permiso di estadia temporal. Den e caso aki no tin permiso pa por labora.

Situacion #3

Re-unificacion di famia tambe ta posibel na momento cu e persona principal tin un permiso di residencia temporal. E persona principal mester tabata biba tres aña den un forma legal na Aruba. Den un caso asina e casa y yiunan di 12 aña of menos por ricibi un permiso di estadia temporal. E yiunan mayor di 12 anja tambe por ricibi un permiso temporal di estadia basta si por prueba cu e ta bai scol y cu ta den posicion di un prueba valido y reconoci, di inscripcion di un scol tambe reconoci. Den e caso aki tampoco no tin permiso pa por labora.

Situacion #4

Re-unificacion cu conciudadano y migrante altamente califica (kennismigrant) cu ta den posicion di un permiso temporal

Den un caso asina e casa y yiunan menor di 18 aña tambe por ricibi un permiso di estadia temporal. Aki tampoco tin permiso pa por labora. Ta obvio cu ora ta trata di re-unificacion di menornan di edad e mayor mester tin autoridad legal di e yiu. Tambe e otro mayor mester duna su concentimiento den e pais di origen prome cu e yiu por biaha.

Si un di e situacionnan menciona aki riba ta aplica na bo caso y bo ta cumpli cu e rekisitonan stipula, bo persona lo por pidi un permiso di estadia basa riba re-unificacion familiar.