E sala yen di Cas di Cultura cu AVP a uza pa duna un splicacion di e Marcha Nacional, a duna e partido e confiansa cu e mensahe cu mester hiba na e Gobierno a wordo comprondi door di pueblo. E tabata un anochi unda a duna detayes di loke a conduci na e decision pa organisa un marcha y con partido AVP kier pa esaki tuma luga.
Un biaha mas cu palabranan convincente e maximo lider politico di Aruba Mike Eman a splica pakico a yega na e decision y cu esaki ta solamente e prome Marcha Nacional contra e Gobierno actual. Prome cu e lider a hiba palabra, diferente politico a splica con nan ta mira e dia aki, e motibonan pa cual di e marcha y cu, manera semper, e marcha mester ta uno trankil unda ta bay hiba un mensahe cla pa Gobierno y despues bek pa cas trankil.

“Persecucion politico ta loke a caracterisa e Gobierno aki, haciendo bida di hende dificil debi na nan color of opinion politico,” Eman a cuminsa su discurso splicando e publico presente.
Pakico un manifestacion awo? Eman a splica historia di 2da guera mundial a mustra tur hende cu den cualkier situacion mester actua tempran y no warda te ora cu ta demasiado laat. Asina el a ilustra e situacion di e Hudiunan, ora cu un grupo di solda a invadi un bario buscando Hudiunan pa wordo hiba pa camponan di terminacion. E tempo ey, si henter e caya ey a lanta contra e soldanan cu no tabata hopi, pasobra no tabata contra nan, e situacion no a sali for di man. “P’esey ban mustra diabierna awor cu nos ta bay lanta y bisa cu hunto nos ta para cada un di e Gobernantenan aki cu ta haci cosnan cu ta mustra cu nan falta respet pa derecho di otro personanan,” bou di aplauso e lider a expresa.
El a duna e ehempel di Raycond do Nascimento, un hoben profesional, kende ya caba a ricibi menasa for di Parlamento (di coalicion) pa motibo di su pensamento politico. E hoben aki tambe tabata presente diamars anochi den Cas di Cultura unda cu el a splica cu tin dos motibo pa marcha y lucha: un cantidad di promesa haci cu no a cumpli cu nan; y siguransa di democracia na Aruba. P’esey e lider a haci un apelacion na tur cu a wordo menasa pa cual tin miedo pa cualkier represalia cu por wordo tuma contra nan, pa participa den e marcha di diabierna atardi y AVP lo defende e hendenan aki te na final.
E compromiso, Eman a bisa, ta cu mester haci apelacion na tur cu ta malcontento, tur famia y amigonan cu a wordo afecta pa maneho of falta di maneho di e Gobierno, pa participa den e Marcha Nacional. “E mensahe mester ta locual ta bo futuro, ta mi futuro; bo destino, ta mi destino; bo porvenir ta mi porvenir, p’esey hunto nos mester cuminsa e marcha y e caminda pa eleccion nobo.”
Prome cu a yega Cas di Cultura, partido AVP a tene reunion den diferente barionan di Aruba, unda cu tur caminda a sinti e preocupacion existente pa rumbo cu Aruba ta tumando. Manera cu Robert F. Kennedy a yega di bisa: “Bo por tin un señal chikito di speransa, pero ora cu e sali for di tur skina y yega hunto, e ta bira un forsa cu por basha’bou e murayanan di opresion di mas grandi cu por existi. Y esey ta bay pasa diabierna ora cu for di tur skina e hendenan yega hunto pa bisa “Aruba kier un eleccion nobo”, pasobra nos tin cu salba e pais aki.”
Palabranan semper elocuente cu a caracterisa e lider politico aki cu mester a sali di su retiro riba peticion di su coleganan di partido y e votadornan di Aruba cu semper a deposita nan confiansa den dje pa saca e isla dilanti den e momentonan mas dificil. Manera un anciana a bis’e: “Mike libra nos di e demonionan aki.”
E Manifestacion Nacional ta tuma luga diabierna y e grupo lo topa na DOW.