Gabinete Wever Croes den apensa shete luna na mando, a logro na ehecuta varios medida contra pueblo y contra tur instancia of persona cu nan ta kere no a sostene e partidonan den coalicion y un logro mas di e gobierno aki ta e persecucion politico di empleadonan publico, Parlamentario Robert Candelaria di fraccion di AVP a declara.

“Tin un lista hopi fastioso cu a sali na inicio di gobernacion cu nomber di hopi hefe di departamento cu personalmente mi a considera un mal joke contra empleadonan publico. Lamentablemente ta resulta cu e no tabata un joke pero mester ta trata aki di un lista cu gobierno ta siguiendo pa kita hendenan den posicionnan clave den nos comunidad.

E forma cu ta kita e hendenan aki ta bay contra loke CAFT a stipula pa e sigiente motibo. Gobierno mester reduci e cantidad di empleado publico, pero nan ta aumentando esaki continuamente ya cu ora kita e hefenan aki, hopi biaha ta pone un ‘management team’ na nan luga’r y mester sigui paga nan salario tambe.

Par’e cu si gobierno mester scohe entre persecucion politico di empleadonan publico of haci loke nan a palabra cu e CAFT, ta prefera pa scohe pa persecucion. Ami no ta contra pa kita un hende cu no ta funciona bon, pero si mi ta contra pa kita un hende for di trabou pasobra e no ta di bo partido.

Ta bon pa mi repasa e lista pa tur hende mira kico mi ta referi na dje:

• Gerald Keteldijk (DTP)
• Isabel Dammers (DIP)
• Whitney Kock (DPS)
• Marlon Farrup (CBS)
• Jerry Starring (DVG)
• Angelo Tromp (CW)???
• Gerald Fingal (Imm)
• Elio Blijden (GNC)
• Richard Tromp (MFA)
• Ruth Tromp (Bo bario)
• Nando Kelly (MFA)
• Serlimar, Bureau innovatie

Y aki ta trata solamente di hefenan di departamento mientras cu ainda tin un cantidad grandi di otro empleadonan cu a wordo manda cas pasobra nan no ta di e partidonan na mando, mientras constantemente ta tuma mas hende den servicio.E lista tin mas nomber riba dje y mi ta spera cu awor e señal a yega cerca gobierno cu ta basta.

Tur e casonan aki ta di lamenta pero di e minister di husticia mi a spera mas. E tabata parce un hende cu no lo participa na cosnan asina  pero awor e ta parce di ta cana dilanti entre su coleganan ora ta trata persecucion di empleado publico.

Sigui riba e ruta aki, ta nifica pa gobierno, sigui crea mas digusto den comunidad y ta solamente adelanta un cambio pronto y inevitabel di gobierno.

Pues no laga niun hende bisa cu e gobierno aki no a haci nada y no a logra nada, loke tur hende kier bisa ta cu e gobierno aki no a logra nada na bienestar di Aruba y pueblo di Aruba,” miembrp do fraccion di AVP, Robert Candelaria a mustra.