Lider di partido AVP Mike Eman a anuncia cu e fundacion Digna Lacle-Herrera ta start e siman aki cu cursonan basico riba tereno estatal. E cursonan aki ta wordo duna door di mr. dr. Rycond Santos de Nascimento y mr. dr. Viola van Bogaert, ambos docente specialisa y doctora riba e tereno di ley constitucional. Eman: “E experticio di e docentenan sin duda ta duna e garantia cu e cursonan aki ta di un calidad halto. Nan ta di importancia pa partido y di esnan cu ta participa na e cursonan aki.”
Partido AVP durante e ultimo decadanan a desaroya dos hala cientifico, Fundacion mr. dr. Mito Croes (antes FESCA) y Fundacion Digna Lacle-Herrera. Eman: ‘Fundacion Mito Croes tin como meta pa desaroya temanan importante pa partido, introduci nan den estudionan pa na momento cu como partido bo ta carga responsabilidad gubernamental bo pensamento y proposito pa pais ta sali no unicamente loke di contacto cu comunidad, pero na mes momento tambe a wordo desaroya den un proceso cu a cana pa por a yega na fundamenta cu si e propositonan cu bo tin por wordo ehecuta den cierto forma procesa den un fundacion antes FESCA y actualmente Fundacion Mito Croes y Fundacion Digna Lacle- Herrera. Fundacionnan cu a hunga un rol hopi importante durante cu partido AVP tabata den oposicion. Nan a yuda formula hopi di e pensamentonan cu a wordo ehecuta durante periodo di gobernacion ya cu hopi trabou a wordo haci caba door di e institutonan cientifico ya menciona cu ta traha banda di partido.
Eman a splica cu e meta primordial di Fundacion Digna Lacle-Herrera ta pa forma politicamente personanan cu ta subi lista y esnan cu ta cerca di partido cu kier sirbi den otro sentido e causa nacional di un pais. “Nos por ta abogado, cientifico, ingeniero, manager, funcionario den p.e. horeca, docente y otro profesion di calidad, pero e esencia di gobernacion y di tin idealnan cu ta ehecutabel ta di por recoge locual ta biba den un comunidad y traduci esaki den un maneho di un pais unda tin idealismo, colectivismo, cu tin hende cu pensamentonan local y internacional. E esencia di tuma tur esaki y traduci nan den un maneho cu ta wordo carga door di un pais y un Parlamento. Esaki ta un ciencia cu bo por desaroya siendo den politica y siendo tambe parti di e formacion politico.”
Eman a enfatisa cu ta pesey ta importante pa personanan no unicamente tin e capacidad preparativo, pero tambe esun mas specialisa cu mayan nos hendenan den Parlamento y esnan cu ta dirigi nos pais a wordo forma tambe cu e capacidad di por carga responsabilidad di nos pais.
E cursonan’Basiscursus Politieke Vorming’ ta cuminsa diahuebs awor dia 3 di mei y ta consisti di tres parti. E prome parti ta ‘Constitutie & Parlementair stelsel‘ di dos parti ta ‘Grondrechten & Rechterlijke macht y di tres parti ta ‘Bestuurlijke besluitvorming & Bestuursrechterlijke rechtsbescherming’. E prome parti ta durante luna di mei riba tur diahuebs, di dos parti ta ta start dia 7 di juni y ta caba dia 28 di juni y parti tres ta di 6 di september te cu 27 di september. E curso ta gratis, pero cuponan ta limita.
Click AKI pa formulario di Registracion
Pa Mas Informacion Download e Brochure Digitalmente AKI
