E sosten pa Partido di Pueblo Arubano, AVP, ta uno sumamente fuerte y esey a keda demostra diabierna atardi na entrega di lista. Vondellaan a comberti den un riu berde for di veld di Cricket te na Nikki Beach. Pero e sosten di e pueblo pa e partido berde no ta caba eynan, un bes riba Linear Park, simpatizantenan a respeta ordo di Polis pa keda patras di baricada, mas no a move y a keda warda te ora nan lider Mike Eman y otro candidatonan riba lista di AVP a sali bek cu e mensahe cu e entrega di lista a bay exitosamente.

Solo y calor di atardi no a stroba e siguidornan di e 29 candidatonan formando e lista electoral mas balansa di 2013. Cu banda y borchi den man a bati man y grita cada un ora nan a sali bek for di Nikki Beach pa demostra nan apoyo y sosten riba un dia asina importante di e proceso electoral na Aruba. E amor ta mutuo y pesey e candidatonan tambe a sa di yega cerca di pueblo pa cuminda, brasa, sunchi y saca potret como recuerdo di otro gran dia pa e partido berde, pero tambe pa tende comentarionan di e ciudadanonan cu semper ta bon bini. Partido AVP ta sumamente satisfecho cu e demostracion di apoyo cu nan a ricibi diabierna pa entrega di lista y ta renoba cu ainda mas forza nan compromiso di recompensa e confianza di pueblo cu trabou duro, dedicacion y progreso pa un y tur riba Aruba.