Na visperia di nos fecha patrio, mi kier para keto un rato pa conmemora e balornan cu ta uni nos como nacion. Sea si bo a nace akinan of bo a bin di un tera leu pa busca un mihor futuro riba nos isla, e nificado di 18 di maart ta mas cu e celebracion di e hecho cu nos tin nos propio identidad, nos himno y nos bandera.

Tur aña 18 di maart mester ta e celebracion di loke nos antepasadonan a logra durante e decadanan cu a transcuri y cu awe orguyosamente nos por wak atras y goza di dj’e.

 

Como nieto di un di e firmantenan di aña 1948 y como tambe nieto di imigrantenan cu a bin forma nan futuro aki na Aruba, ta yenami cu orguyo di por a sirbi mi isla como Gobernante y awor como Parlamentario.

Den ambos funcion mi tabata y tin ainda e tarea di busca e miho solucion posibel pa tur reto di nos comunidad. E ta un tarea enorme y ta bira mas dificil ora circumstancianan interno of externo pone presion riba nos.

Bou tur circumstancia nos mester keda sirbi interes general y busca activamente un balansa entre continuidad y renobacion, entre desaroyo economico y mehoracion di calidad di bida, cu den e forma mas amplio posible mester keda vigente.

 

Manteniendo e norma y balornan cu nos himno y nos bandera ta recorda nos, ban recorda den dianan aki tur esnan cu e lucha pa nos Status Aparte y e libertad cu nos ta goza di dje awe.

Cu e mesun sentimento patrio, mi ta invita henter pueblo di Aruba pa sali y demostra nan amor pa nos isla bishitando e diferente actividadnan cu lo tin rond.

 

Felis Dia di Himno y Bandera!