Ayera nos a haya e noticia bergonsoso cu minister-president Evelyn Wever-Croes a impone un toegangsverbod prohibiendo pa Liesje Khemlani drenta edificio di Parlamento. Segun e carta Liesje posiblemente lo a comete actonan politico cu no ta cuadra cu su funcion di ambtenaar. Cu otro palabra no tin nada concreto contra Liesje. Nan no tin nada pasobra Liesje pa tres decada ta haci un bon trabao como ambtenaar y como archiefbeheerder di e archivo di Parlamento.
Liesje ta un persona detayista cu ta stima ley y procedura di ley. Tambe e ta un persona cu no tin miedo pa vocifera su opinion. P’esey no mucho tempo pasa el a dirigi un carta na Gabinete di Gobernador splicando cu el a observa un falta den procedura di gobierno cu hasta gobernador no a cay ariba. For di Gabinete di Gobernador a bin un carta gradiciendo pa ta asina atento. Esaki tambe ta mustra otro aspecto di e caracter di Liesje: servicial. Tempo mi tabata traha na Universidad di Aruba e tabata yuda ami, mi coleganan y studiantenan cu informacion. Liesje tambe a yuda regularmente personanan manera Armand Hessels of Ricardo Croes cu informacion y semper Liesje por duna un servicio excepcional pasobra e ta conoce e contenido di hopi documento den e archief. Liesje ta haci su trabao na manera profesional y color politico no ta impedi Liesje di yuda ningun hende. P’esey Liesje ta un tesoro pa cada Parlamentario cu kier haci su trabao na un manera serio y bon documenta. Pa Parlamentario nobo e ta ainda mas importante, pasobra Liesje ta yuda bo cu letterhead di Parlamento, modelo di cartanan pa Voorzitter di Staten, modelo di pregunta pa minister, peticion pa un reunion etc. E hasta sa conseha pa cambia un formulacion pa e ta mas nechi, mas comprendibel of simplemente mas corecto.
Pa ta completamente honesto mester bisa tambe cu Liesje tabata conoci como un MEP del alma. Kico por a causa pa su amor pa MEP fria mi no sa, pero nos tur por imagina si: Liesje tabatin acceso na tur documento y lo a realisa e mentiranan, hipocresia, envidia y ken sa hasta mas… Na otro banda no ta dificil pa compronde dicon MEP a crea un odio contra Liesje: na momento cu un hende tin e curashi pa para pa berdad, bo ta bira un peliger pa un partido cu tin hopi pa sconde. MEP ta un partido cu kier sconde e berdad den bista cla, manera lista largo di nepotismo y fix: Evelyn y su tata, swa, primo etc., Glenbert y tur su rumannan, Endy y su sidekick/ruman Edmond, Dangui y … E lema: nos ta fix nos hendenan!
Naturalmente Edgard Vrolijk no kier keda atras y kier pa fix e posicion di parlamentario lo mas pronto posibel. Ora cu Liesje a tribi di sugeri cu mester fix e inhusticia di e 12.6% door di apoya un re-post di Josephine Albertus riba dia 29 di januari 2022 riba e wall di un amiga, Edgard Vrolijk a hala atencion di Liesje publicamente. E Voorzitter inflado a bolbe rabia ora cu algun dia despues mi persona a mustra con Raad van Advies a hala atencion di Edgard Vrolijk y Rocco Tjon pa motibo di entrega un iniciativa di ley cu no ta cumpli cu normanan di calidad ni di consistencia. Edgard a core exigi di Liesje ta cua documento a drenta 6 di mei 2020. E pober aparentemente nunca a lesa e documento den su mesun dossier. Probablemente huma ta sali for di orea di Edgard ora e ta wak Miguel Mansur of Marisol Lopez-Tromp of Gerlien Croes cerca Liesje. E sa cu nan lo sali bon documenta for di archief y esey naturalmente no ta cumbini e gobierno di La Integra. P’esey a core pidi e persona mas integro den henter historia di Aruba, señora Evelyn Wever-Croes, pa atende cu Liesje. E respuesta di La Integra ta pone nos corda riba nos himno y nos amor pa libertad, pasobra na Aruba represion y persecucion politico ta un realidad. Ken por nenga cu nos gobernantenan kier controla nos a la fuerza y pa motibonan politico. E deseo ferviente ta pa destrui tur oponente politico, demonisa tur contrincante y tapa e boca y silencia bos di cada opinion contrario na e liña di e partido MEP. Ta tempo pa nos exigi cambio. Ta basta!
