Dialuna awor 5 di october mundo henter ta celebra dia mundial di maestro. Ja ta 3 aña pasa cu e ultimo celebracion di “Education Month Aruba” a tuma lugar, y aunke e circumstancianan no ta na fabor, Aruba sigur no ta solamente felicita boso, pero tambe ta gradici boso pa boso contribucion, dedicacion y esfuerso.
Contradictorio semper tawata e vision- y ideanan riba locual Aruba mester haci cu su sistema di Enseñansa. Cualkier sea e decisionnan, e unico meta mester ta pa crea un fundeshi solido cu por hiba nos na un Aruba cu un Economia di conocemento, unda cu nos por sigui crece y segura e cantidad di hoben- y adultonan cu por termina por lo menos un scol secundario.
Pero pa por crea e fundeshi aki nos tin mester e mapa y ingeniero, pa por guia kico ta e accionnan rekeri pa hiba nos na e exito desea. Lamentablemente, e mapa laga atras 2017 awe ta ahusta na un forma cu e fundeshi necesario ta completamente sin structura. Tin hopi inseguridad, preocupacion, pregunta sin contesta, cambio y idea sin splicacion y sin consulta. Pero locual semper ta e parti positivo, cu nos lo por cuminsa di nobo y aunke lo costa nos mas tempo y inversion, lo importante ta cu boso amor y dedicacion si ta indestructibel y esey ta mantene nos enseñansa bibo, y lo yuda nos logra surpasa tur tempestad. Pregunta ta, ta con nos lo cuminsa di nobo? Mas aun cu nos ta asota door di un crisis y ainda sin un rumbo fiho pa nos futuro.
Optimalisa infrastructura tawata semper e peso di mas grandi den nos desaroyo di enseñansa y e reto principal ta cu Aruba nunca a conoce un plan structural di mantencion pa nos scolnan. Entre 2013-2017so Awg 33.785.000,- (miyon) florin a wordo inverti den reparacion, renovacion y construccion di edificio nobo. Na 2017 a haci un traspaso na e Minister actual cu un lista di 31 proyecto cu falta na balor di Awg 40.000.000 (miyon) mas- pa locual ainda no tawatin financiamento disponibel. Cuanto por desconta awe di e Awg 40 miyon aki nos lo por conclui cu no ta mucho, cual ta nifica tambe cu probablemente e lista a bira uno mas largo y costoso awor. Esaki ta solamente infrastructura cu ta bay a costo di calidad y cuido di nos enseñansa, docente y tur otro personal, asistente, psicologo, curriculum, seguridad, digitalisacion, material y mas. Realidad ta, cu ni maske cuanto ta desea di purba corta, spaar, kita post di begroting, independisa, privatisa enseñansa lo no desaroya of mira cambio sin inversion. Y akinan nos lo tin cu cuminsa. Structura!
Cualkier sea esun cu tuma e sigiuente mandato lo mester sa y realisa cu pa nos surpasa e tempestad aki, y cualkier otro nos dilanti, pa nos crea pilarnan economico nobo, pa nos diversifica nos economia, empodera nos hendenan, crea dirigentenan di e pais aki capas pa nan trabou, siña nos generacion nobo biba den e mundo di siglo 21, y yega na e Aruba cu nos tur ta anhela, structuracion di Enseñansa por ta e unico punto di salida cu por cambia e rumbo di nos pais! For “once and for all” laga nos recobra e pais aki cu e amor y dedicacion indestructibel manera semper nos maestronan a sa di haci.
