Diabierna ultimo Palamento a trata presupuesto supletorio den e estilo cu gabinete Wever Croes ta conoci pa atende situacionnan cu ta regarda interes general di e pais.
Miembro di fraccion di AVP, sr Michael Lampe hunto cu su fraccion a cuestonia formalmente henter e forma con gobierno ta manda un asunto asinta importante pa parlamento controla, caminda ta resulta cu ningun miembro di e tres fraccionnan cu ta sostene gobierno, a haci ni un solo pregunta.
“Gobierno a manda un presupuesto supletorio 2019 pa Parlamento aproba caminda tin 14 miyon florin cu a wordo gasta di mas sin cu nan tabata presupuesta, pues no ta un florin of 10 florin pero 14 miyon cu gobierno a gasta di mas, placa di pueblo.
Aki ta bon pa pueblo tuma nota di esaki, caminda 11 miembro di fraccionnan cu ta sostene gobierno, no a dirigi ningun pero ningun pregunta na ningun minister riba kico nan a haci cu e placa, di con e 14 miyon aki a wordo gasta di mas pero nan a prefera sinta manera un set di mucha manda, dirigi pa gobierno y haci loke gobierno a ordena nan pa haci.
Serlimar a gasta un suma cuantioso na propaganda y promocion cu no tabata presupuesta pero ningun pregunta a wordo haci riba esaki di e tres fraccionnan aki, loke ta confirma cu lider di POR ta e capitan di e gobierno aki y por haci y deshaci con y ki ora cu e kier.
Tin un suma di 3.8 miyon florin cu a wordo aproba den Comision Central pero representantenan di pueblo di e fraccionnan di gobierno, ta haya ta bon cu pueblo no mester wordo informa di esaki y nan no kier haci pregunta fastioso na gobierno.
Fraccionnan cu ta sostene gobierno no tabatin interes di pueblo na pecho y solamente a hunga nan wega di semper di bay bek den pasado sin cu a trata ni un solo punto di e presupuesto supletorio cu gobierno a presenta.
Kisas e momento cu mas a confirma cu e tres fraccionan aki ta baila riba ritmo di gobierno, ta ora cu lider di fraccion di MEP, Rocco Tjon a hiba palabra y a bin trata di menosprecion puntonan cu mi persona y miembronan di fraccion di AVP a trece dilanti.
Loke ta di hopi balor y ta bon pa pueblo compronde e expresion aki bon ta ora cu e lider di fraccion di MEP a bisa sr Presidente: “Praten is zilver en zwijgen is goud.”
Net loke su persona y tur otro miembro di e tres fraccionnan cu ta sostene gobierno a haci, esta di keda keto pero no lucha pa sirbi interes di pueblo.
Rocco Tjong a confirma cu gabinete Wever Croes por haci y deshaci manera cu e ta haya ta bon cu fondonan di pueblo di Aruba, aumenta gastonan di persona, gasta placa na promocion di Serlimar, aproba miyones di florin cu no tabata presupuesto, caminda nan tin cu keda keto y simplemente sacudi cabes y grita: “voor.”
Ningun pregunta na ningun minister riba kico nan a haci cu e placa aki, ninun preocupacion demostra na interes di nos pueblo y tur esaki di e hendenan cu a bin den Parlamento pa un era nobo, un era pa controla gobierno pero cu no tin curashi pa haci esaki.
Loke a sosode diabierna ultimo tabata algo serio, algo caminda a keda demostra cu Aruba tin un parlamento cu ta sordo manipula, dirigi y ordena kico nan tin cu haci y ki ora nan tin cu haci esaki mientras cu interes di pueblo y di e pais no ta na prome luga y solamente mas medida miembronan di e tres fraccionnan aki a sigura pa pueblo haya atrobe den 2020,” Parlamentario Michael Lampe a declara.
