Robert Candelaria, parlamentario di fraccion di AVPm a mustra cu den fin di siman e Minister di Husticia a demostra un biaha mas cu e no ta domina e materia di Husticia y esaki ta tristo ya cu ta cu pa 13 aña caba e ta anhelando e posicion aki.

E parlamentario a sigui mustra cu pa 8 aña largo e tabata den Parlamento y e unico cos cu e tabata haci ta busca manera con pa critica e Minister anterior di Husticia, busca manera con pa hay’e  ta baha y bisa continuamente cu ora e haya chens pa bira Minister di Husticia, e lo percura pa e area aki cana bon. No obstante esaki AVP a dicidi di duna e persona aki e beneficio di duda pasobra e ta abogado di profesion y tin un bon carera tras di lomba y mester por logra algun di e cosnan cu el a bisa pueblo cu e ta bay haci.

“Loke cu nos ta mirando for di momento cu el a bira minister,  ta cu e ta comete fout tras di fout, nos ta mira cu e ta haci algun mas bisto, otronan menos bisto, grandi of menos grandi pero e ta consistente den comete eror.

Den fin di siman cu a pasa no solamente el a comete eror pero esaki a bay asina leu cu e Prome Minister a haya ta necesario pa bula aden, aclarea e asunto y di un forma kisas scapa cabes di Minister di Husticia. Esaki ta lanta e pregunta si internamente a pone e Minister aki bou di curatela, pa yud’e of guie un rato pa e situacion por calma.

Loke cu AVP a constata aki no ta tumando luga solamente cu Minister di Husticia ya cu tin algun otro ehempel cu nos a yega di trece padilanti caba.

Algun tempo atras Minister Glenbert Croes a bin dilanrti bisa cu e ta bay subi e salario minimo loke a pone cu Prome Minister mester a bin afo pa aclarea e asunto aki pa splica of drecha e declaracion pa evita cu ta surgi expectativanan robes.

Despues di esaki tabata Minister Dangui Oduber cu a sali afo ataca Huesnan, bisa cu nan  ta “politiek verziekt” y ue n biaha mas Prome Minister mester a bula aden y bisa Oduber cu como Minister mester respeta Corte, aunke cu e no ta di acuerdo cu nan decisionnan of loke cu nan ta bisa.

Prome Minister banda di su trabou cu ta hopi, awor tin cu vigila su Ministernan tur dia y henter dia pa mira kico nan ta haci pa ora cu ta necesario coregi of hasta tuma over, ora cu ta necesario. Mi ta kere cu esaki no ta e forma con Gobierno mester funciona.”

Ora cu Gobierno di AVP a tuma mando over, a drenta c’un vision cla y un team di personanan capas, c’un plan hopi cla di kico ta bay haci y con esaki lo wordo ehecuta.

Si nos haci un comparacion cu e Gobierno actual cu 10 luna pasa a tuma over, no tabata mucho cla kico tabata nan vision, nan plan y loke cu mas y mas ta resaltando ta cu e hendenan cu mester a yuda Gobierno logra  loke cu nan kier a logra, no ta capacita pa haci e trabou cu nan a haya poni nan dilanti. SI bo mira e dos gobiernonan, bo ta mira un diferencia hopi grandi.

Mi ta kere cu esaki ta loke nos tin cu keda mira. Esun cu a tuma over awo no tin un plan concreto di con pa yuda y hiba e pais aki dilanti. Gobierno ta mas ocupa solamente nombrando amigo-, famianan, ta persigui hendenan cu ta traha den Gobierno, pero e plan pa yuda e pais bay dilanti no ta mira esaki den ningun forma,” Parlamentario Robert Candelaria a splica.