Despues cu siman pasa e miembro di Partido AVP, sr Melvin Tromp a entrega un keho na Ministerio Publico contra di Prome Minister Evelyne Wever Croes pa decisionnan cu ta mustra cu e ta favorece e bufete di abogado den cual su persona tambe ta forma parti di esaki, AVP a haya mas prueba cu en berdad ta confirma e sospechonan aki.
Melvin Tromp diamars mainta a presenta na oficina di Ministerio Publico cu mas prueba riba e practica di Prome Minister, den cual ta mustra ainda mas cu en berdad e prome mandatario ta sigui favorece e bufete di su tata den cual e tambe tin participacion.
“Ora cu Prome Minister Evelyn Wever Croes kier papia di integridad, e tin cu practica loke e mes ta predica y esaki no ta e caso cu su persona, sigur mirando documentonan cu nos a haya den nos brievenbus den ultimo dianan, riba decisionnan cu su persona a tuma.
Ya caba siman pasa nos a entrega keho cu diferente prueba cu e peticion pa Ministerio Publico cuminsa c’un investigacion pero nos a bolbe haya mas documento for di pueblo relaciona cu decisionnan cu ta confirma cu Prome Minister ta beneficia e bufete di abogado, di cual su persona ta socio di dje.
Un di e documentonan cu firma di Prome Minister abou, ta autorisa un miembro di e bufete di su persona, pa representa su su persona den diferente reunionnan importante di companianan di utilidad, cualnan ta su responsabilidad.
Ta berdad cu Prome Minister ora cu el a huramente a distancia su mes for di e bufete aki pero a staciona su derechonan den un tipo di fundacion bou caminda ora cu e momento yega cu e no ta Prome Minister mas, e derechonan aki lo bay bek pa su persona.
Esaki ta nifica cu tur ganashi of otro puntonan cu e bufente aki logra, lo bay bek na su persona ora cu e bolbe ta activo cu e bufete di abogado di su tata.
Tin un carta cu Prome Minister a manda pa hunta di directiva di e companianan di utilidad cu e peticion pa envolvi otro oficinanan di abogado pa asisti den casonan cu tin mester pero na mes momento e ta dicidi di previlegia e bufete di su tata y den cual e tin interes, pa respresenta su persona den cierto reunionnan pa motibo cu e lo no tin tempo pa esaki.
Pues claramente esaki ta un tipo di conflicto di interes mescos cu e tantisimo casonan cu e bufete di abogado menciona a wordo paga den e ultimo aña y mey pa duna asistencia huridico.
Nos ta kere cu e cosnan aki no ta bon, no ta cuadra cu e insistencia di Prome Minister kende continuamente ta papia di integridad den gobernacion.
E pruebanan aki nos a entrega na Ministerio Publico pa wordo agrega na e prome denuncia haci siman pasa pa asina nan forma parti di e investigtacion cu nos ta pidi e departamento aki pa haci riba e desaroyonan aki.
Si Prome Minister kier drecha mundo e tin cu cuminsa cu su persona mes y no sigui beneficia un bufete cu tur hende sa e ta sigui forma parti di esaki y mientras cu e ta inactivo na e momentonan aki den e bufete aki, den futuro e lo bolbe y lo gosa di e beneficionan logra a base di su decisionnan tambe.
Esey nos ta considera enrekisimento propio, den un forma incorecto y cu mester wordo investiga pa mira si e tipo di decisionnan aki no ta un conflicto di interes hopi serio caminda pueblo ta wordo perhudica pa su persona Sali beneficia den futuro,” Melvin Tromp di AVP a declara.
