Banco di Seguro Social (SVb) a anuncia cu desde 1 di februari lo no paga Reparatietoeslag mas na pensionadonan cu tin un entrada mas halto cu e pensioen basico di SVb. “Hopi pensionado cu tin un pensioen chikito adicional, por ehempel di LAGO of di Hospital, cu hopi biaha no ta mas cu 250 florin riba nan pensioen di SVb, ta perde nan reparatietoeslag di 125 florin”, asina Parlamentario mr. drs. Richard Arends (AVP) a splica. Pareu cu a introduci e crisisheffing pa cubri e gastonan adicional di e Gobierno aki, a elimina e reparatietoeslag pa un grupo grandi di pensionado.
“Partido AVP a bin ta adverti esaki y a tene varios reunion informativo pa alerta comunidad, pero Gobierno a nenga enfaticamente cu e pensionadonan lo bay atras”, segun Richard Arends. “Te ainda durante tratamento di presupuesto y reforma fiscal na final di aña a bolbe haci pregunta riba e reparatietoeslag pero Gobierno a evadi contesta”.
Na momento cu lider di fraccion di AVP a puntra si pensionadonan lo bay atras, Prome Minister a bisa enfaticamente cu esey no ta e caso y a hasta cuestiona capacidad di fraccion di AVP pa compronde textonan legal. “E ley pa introduci e crisisheffing ta papia bon cla cu e pensionado cu tin un entrada mas halto cu e pensioen di SVb, lo no bin mas na remarca pa e reparatietoeslag”, Parlamentario Arends a indica.
A introduci Reparatietoeslag na aña 2012 como producto di e Dialogo Social. Su meta a sirbi hustamente pa brinda alivio na esunnan mas vulnerabel y recupera nan perdida di poder di compra. Awe e pensionado mes lo paga e compensacion cu Gobierno a anuncia den forma di e reduccion di e prima di AZV y ta wordo azota un biaha mas door di efectonan di e medidadnan cu Gobierno a impone prome cu fin di aña.
“Nos ta lamenta esaki profundamente,” Parlamentario Richard Arends (AVP) a declara. “Specialmente si bo mira cu fraccion di AVP di manera constructivo a prepara un amienda pa evita esaki, pero a wordo rechasa door di partidonan den coalicion. Hunto cu introduccion di e crisisheffing, Gobierno e elimina e reparatietoeslag di mas di 10,000 pensionado”.
Mientras cu Gobierno a bisa cu supuestamente tur hende ta bay dilanti den nan entrada, comunidad mester carga un peso di 270 miyon florin, specialmente esunnan di mas vulnerabel.Gobierno nunca a bin cu un compensacion adecuado pa empleadonan den sector priva, pa ambtenaarnan, pa esunnan cu ta biba di bijstand y tampoco pa empresanan chikito. Mientras cu ta hiba un asina yama “maneho” unda cu e ser humano lo ta central, a kita reparatietoeslag for di miles di pensionado. E pensionado cu un entrada te cu 2500 florin lo ta bou di e impresion di bay dilanti cu 100 florin pa motibo di reduccion di e prima di AZV, pero na mes momento e ta perde su reparatietoeslag di 100 florin.
“Ta indignante pa constata cu e pensionado mes lo paga pa su reduccion di prima di AZV, cu tanto Gobierno a priminti, cu eliminacion di su reparatietoeslag”, asina Parlamentario Richard Arends a splica.
