Durante conferencia di prensa diamars mainta fraccion di AVP, Lider di partido a subraya e posicion nobo cu e partido lo tuma di awo en adelante. Ex Minister di Husticia, mr. drs. Arthur Dowers no por reconoce cierto desaroyonan pasando pa cu e situacion/posicion cu Ministerio Publico ta tuma.
Di su banda Arthur Dowers ta bisa cu durante Gobernacion di AVP tur locual ta tumando luga, no lo sosode, mucho menos cu lo tin Parlamentarionan cu lo influencia Ministerio Publico di e forma cu ta tumando luga na e momentonan aki.
Caso di Lotto pa Deporte ta un caso, unda cu tabatin corupcion caminda a haci denuncia na Polis pero e caso a keda kita y transferi pa landsrecherche y cu despues a cay na awa. Informacion cu PG a duna Dowers specificamente riba e caso di fraude aki, ta indica cu mester a trata e caso di forma diferente pero pa falta di un bon investigacion/forma corecto pa atende cu e caso, cu a lag’e cay na awa. Un persona a scapa di corupcion hopi bisto y esaki directamente door di intervencion di Ministerio Publico. Esaki ta un realidad cu a keda treci na dje como Minister di Husticia.
Varios tabata e parlamentarionan cu a mustra nan preocupacion riba e caso specifico di Lotto, cu den prensa a comunica diferente opinion, pero nunca a bay sinta na mesa, tene reunion simannan largo, traha proces verbaal hunto cu Ministerio Publico, tene conferencia dilanti Ministerio Publico pasobra simplemente Partido AVP nunca a kere cu mester mete politicamente den husticia.
Prioridad di Gobierno di AVP semper tabata e bienestar di e Pueblo manera lider di Partido Mike Eman a menciona y no pa saca probecho politico for di investigacion mucho menos pa bay influencia directamente pa persigui of investiga contrincantenan politicamente mirando cu Ministerio Publico tin e instruccion ey pa hacie riba su mes.
Lamentablemente por presencia awe con e caso a bin dilanti y ta bisa cu “mogelijk” por tin un strafbare feit, bisando e ora cu no a constata ainda un strafbare feit pero ta awo ta bay mira si tin, mientras ta bay na uza medionan hopi fuerte cu violacionnan flagrante (cubri pa ley) riba derechonan fundamental di hende. Cu impacto hopi grandi riba hende pa despues di dos aña bin afo y bisa cu ja no a haya nada!
Refereniendo na e caso di Marko Espinoza, Dowers ta comenta cu el a tuma nota di e proces verbaal cu despues di dos aña a entrega na Espinoza, captando su atencion cu algun punto. Declaracion duna tabata indica cu e persona cu nan a interoga a declara di tabata trahando ilegal riba nos Isla y cu su persona no tabata compronde mucho bon e idioma papiamento. Cuestionando asina su declaracion si acaso e persona aki lo a compronde locual e por/of no por a scucha pa asina presente den un forma corecto, a habri hopi duda caba.
Bayendo bek riba e caso di Marko, e declaracion cu e persona a duna claramente a indica cu e tabata ilegal y trahando pa un persona yega na e Minister di forma ilegal, tur esaki den e proces verbaal. Mientras no ta mira niun caminda cu a bay over na haci investigacion riba e hecho aki. Tema primordial cual tabata ilegalidad y menasa grandi riba nos isla e tempo ey. Captando asina Dowers mes su atencion cu no ta un Fiscal dus un Fiscal lo mester por a capta esaki tambe.
####
