Parlamentario drs. Mervin Wyatt-Ras a elebora durante conferencia di prensa semanal di partido AVP encuanto di e hobennan cu ta den noticia como sospechoso di asesinato. Ta trata di un hoben di 16 anja cu a asesina un persona di 54 anja y un otro hoben cu ta ser sospecha di asesino di su propio welo di 77 anja di edad. Wyatt-Ras a expresa palabranan di lamento pero tambe di duele. Aki nos tin cu wak nos mes den spiel. Kico a bai fout? Unda tur hende tabata? Dicon no a ripara cu e hobennan aki tin problema? Ta trata di dos hoben, kendenan un tras di otro ta haya nan mes den un situacion semehante di asesinato. Castigo lo ta bai tin y kizas ora e hobennan aki sali for di prison ta hopi anja despues. E ora e hobennan aki kizas ta adulto y nan posibilidadnan pa recupera y reintegra den comunidad ta dificil. E ta un “wake up call” pa tur hende y profesional, pa inverti tempran den educacion, prevencion y den formacion social pa nos atende cu esaki. Wyatt-Ras ta puntra alabes unda Minister Presidente Evelyn Wever-Croes ta, dicon e no ta reacciona? Unda minister Glenbert Croes di Asuntonan Social ta? Unda minister Andin Bikker di Justicia ta? Pasobra na momento cu e gobierno aki a asumi su reponsabilidad di gobernacion a usa dos mucha cu a perde nan bida pa motibo di maltrato y abuso. A usa nan pa declara cu Aruba ta den crisis social y a pidi sosten di Parlamento pa un fondo pa crisis pa inverti mas di 30 miyon den esaki. Fraccion di AVP a duna su sosten pa pone e suma disponibel pa sector social. Sinembargo ta resulta dor di diferente sucedido y reaccion den pueblo cu crisisplan no tin e efecto cu e gobierno aki a priminti. Instancianan no a ricibi e sumanan cu a ser priminti na nan, clientenan hoben den problema no a haya e ayudo manera priminti. Pa loke ta trata e 2 hobennan cu a comete asesinato apenas e prome siman di anja 2021, por bisa cu ora cu gobierno a sinta e hoben di 15 anja tabatin 12 anja y esun cu tin 16 anja awo tabatin 13 anja. Nan tabata pues mucha chikito e tempo ey. Mester a haya nan riba radar of miho bisa mester tabata sa cu nan tin problema. Paso a exigi pa inverti miyones pa combati problema di Hubentud y a nombra cantidad di persona pa yuda. Pesey Wyatt-Ras ta keda skerpi ariba e plan aki, despues di a sostene. Gobierno cu a acusa gobieeno anterior mester duna cuenta na pueblo dicon e plan cu nan a introduci no tin efecto. Prueba cu e plan mo tin su efecto ta entre otro demostracionnan na fin di anja di esnan preocupa pa e situacion di abuso di menor. Wyatt-Ras ta cuestiona minister di Asuntonan Social y gobierno ariba esaki. Minister cu a priminti mester sali y bin padilanti y duna splicasion. Kico a bai fout den e famianan aki pa loke ta trata educacion di e hobennan aki? Con por tabata asina cu nan por a yega den tal extremo? Ki tipo di yudansa e ta bai ofrese? Banda di esey gobierno mester follow up ariba e mayornan di e dos muchanan cu a wordo mata cual sucedido a conduci pa lanta crisisplan. Nan a wordo usa dor di e gobierno aki pa bin cu e plan paso segun e gobierno aki nada a ser haci den sector social promer cu nan a drenta gobernacion, locual no ta cuadra cu realidad. Pero awor gobierno aki cu a priminti shelo y tera mester bai trece cambio. Ken a follow up riba e famia di e muchanan aki? Con a para cu e mama despues cu el a sali foi prison? E tin mas yiu? Con e ta wak pa su yiunan? Gobierno mester duna claridad encuanto e puntonan aki. Enbes di bin cu show, presenta logo di crisisplan y papia di proyectonan nobo di suma cuantioso, mester sikiera purba fortifica y mehora formanan di traha existente. Tin hopi mucha cu ainda ta cai “tussen wal en schip” dor cu nan comportacion of problematica no ta facil pa referi nan, dor di cual nan no ta haya yudansa y cuerpo policial ta topa nan cometiendo actonan di criminalidad. Tin hopi placa cu a ser inverti den e plan di crisis social. Nos mester mira su resultado tambe. Paso sino tin resultado, con bo ta bai sostene proyectonan nobo y no ta mira mehoracion den practica di bo comunidad. Esey tur hende ta puntra nan mes y ta pendiente di dje y Wyatt-Ras ta spera cu e ministernan step up awor y bin padilanti, trece na cla kico ta pasando y con lo anda cu e situacion.