Durante e mensahe di fin di aña di Partido AVP, candidato Muzaninn Wever a refleciona a riba e maneho financiero/economico inadecua di e aña anterior cu a causo hopi precupacion serca comerciante(nan). Embes di enfoca ariba diversificacion di nos economia, inversion strategico pa impulsa economia y ofrece oportunidadnan nobo ta castiga comerciante y cuidadano nan cu medida doloroso.

E dolor y agonia aki a wordo vocifera pa Muzaninn Wever durante su discurso di fin di aña: “Gobierno simplemente ta kibrando empresanan. E weso di lomba di nos economia ta wordo fractura pa medida tras di medida cu na final di dia ta afecta henter e pueblo”, segun Muzaninn Wever candidato di Partido AVP.

No tin atencion pa mehora poder di compra di nos cuidadanonan cu tin su efecto directo pa economia di nos Pais, sinemebargo ta impone mas medida cu ta inhusto, contra efectivo y sin nuin forma di consulta. Muzaninn Wever mirando su legado como jui di mayornan cu a crea un empresa chikito, ta subraya “Ora Bo kibra negoshinan chikito y kibra forsa di compra di Pueblo, Bo ta kibra nos economia y nos bida mes! Kibrando e companianan mediano y chikito ta pone cuponan di trabao tambe na peliger”.

Muzaninn Wever a elabora eloquentemente tocante e inspiracion pa e maneho cu lo mester brinda perspectiva positvo y alivio na nos comerciante y nos consumidornan bisando: “ E Bon Comun, e pensamento di traha na beneficio di tur, ta reta nos pa fiha un maneho cu ta brinda oportunidad pa tur ! Nos consumidornan y nos comerciantenan mester di un alivio y un pespectiva positivo.”.

Muzaninn Wever ta desea  comunidad di Aruba un Bon aña y ta anima nos tur pa hunto lucha pa e cambio contra medida y destruccion. Hunto nos lo trece e cambio necesario cu lo haci e aña nobo aki un BON AÑA.