E hotelero veterano Alex Nieuwmeyer tabata un di e participantenan den e di dos parti di e sesion di brainstorm ‘Turismo den Perspectiva’. Bayendo directo na e punto y cu tur sinceridad el a pinta un scenario den cual 2021 lo ta un aña dificil, pero cu e esnan den e industria turistico no ta perde speransa. E evento organisa pa Partido di Pueblo Aruba (AVP) ta tumando luga semanalmente pa cubri tur aspecto di nos pais. Ademas di Nieuwmeyer, tambe tabata presente sindicato FTA y varios union di taxista.

“Di algun manera nos tin cu sali di e crisis aki,” asina e gerente di hotelnan Divi na Aruba a bisando indicando cu, diferente na otro añanan, tin hopi incertidumbre a base di tur e factornan cu ta guia henter e crisis aki di COVID. Su punto principal ta cu e industria hotelero ta pasando de malo. “Nos tin confiansa den futuro, pero nos tin cu prepara nos mes pa un aña henter di perdida den 2021.” Pesey mes e ta boga pa traha hunto pa asina minimalisa e eefcto lo mas posibel.

E delegacion organisado consistiendo di lider di AVP mr Mike Eman, Jennifer Arends-Reyes, mr. Gerlien Croes, mr. drs. Richard Arends y drs. Gervais ‘Rene’ Herde a scucha atentamente, haciendo preguntanan tambe na e hotelero pa asina formula posibel solucionnan cu for di sector publico; sea den oposicion of no, por contribui na un miho reconstruccion di turismo, nos economia y nos mercado laboral.

Ora a puntra Alex Nieuwmeyer kico e ta bay cune for di e encuentro, el a indica cu esey ta cu, por lo menos tin un dialogo, y esey ta hopi importante. “Nos tur tin cu traha hunto y mantene Aruba safe. Nos mester mantene COVID lo mas posibel bou control y ta un destinacion safe. Aruba mester ta diferente di otro destinacion, manera Republica Dominicana, cu si a kita tur rekisito, laga tur hende drenta y wak pa nan mes. “Nos no ta asina. Nos ta prefera di presenta un destinacion cu ta safe, caminda e turista por ta safe y nan ta dispuesto pa paga un poco mas pa esey. Mi ta kere esey ta importante y mi ta kere tur hende ta di acuerdo cu esey.”