E gobierno di MEPPORRED a priminti cu nan lo goberna di un forma transparente y cu integridad lo ta importante pa nan den gobernacion. Un gobierno cu realmente ta transparente lo ta caracterisa pa un forma di gobernacion cu por lo menos lo contesta preguntanan di Parlamento. 

Un parti esencial di e trabou di Parlamento ta pa controla gobierno, haciendo pregunta riba nan maneho y tambe riba presupuesto. Preguntanan cu, no solamente ami a haci, pero tambe di coleganan di Parlamento, casi semper ta keda sin contesta.

Manera mi a bisa den pasado, asta preguntanan por escrito cu mi a haci pa tratamento di presupuesto a keda sin contesta door di Minister. Con bo por yama bo mes transparente ora esaki ta bo forma di traha?

Pregunta sin contesta

Ami tambe a haci pregunta den pasado y si boso como miembronan di prensa ta corda, nan nunca a wordo contesta. 

Por ehempel 

• mi a puntra cuanto personal gobierno a tuma extra den servicio, desde cu nan a tuma mando? Nos sa cu den e prome 3 lunanan di gobernacion, e gobierno aki a tuma 100 persona mas tanto den servicio cu e gobierno di AVP. Pues a kita 300 hende y apunta 400 hende nobo den 3 luna di tempo. 
• Mi a puntra over di contract cu oficina di abogado y di consehero y e gastonan envolvi cu esaki. 

Tur e preguntanan aki a keda sin haña contesta nunca. Hasta ora manda un rappelbrief cu ta manera un carta di recordatorio, no ta contesta esaki, pero ta sigui yama nan mes un gobierno transparente. Mester stop di yam’e loke e no ta. E no ta transparente. 

No ta nos a pone palabra den boca di e gobierno pa nan yama nan mes transparente. Ta nan escogencia boluntario esey tabata. Nan kier a caracterisa nan mes como transparente pero manera nos tur sa cu bo hechonan ta papia hopi mas duro cu bo palabranan. 

Mi a hasi pregunta tambe:

• over e contrabanda di oro di Venezuela y c’un campañado di prome minister actual tabata envolvi den e caso? Si no tabatin nada, e por a sali y contesta mi preguntanan y e discucion aki lo a caba. Pero a scohe pa no contesta. 
• Mi a puntra over e persona su contacto cu e team di campaña di e actual prome minister. Mi a puntra di link cu su empresa y e prome minister. 
• Tambe mi a haci pregunta cu e empresa ta inscribi na Arulex building cu ta unda prome minister tabatin su oficina pa hopi tempo. Tur esaki y hopi pregunta mas encuanto smokkel di oro nunca a wordo contesta. 
• Unda e transparencia ta den esaki? 

Si ainda bo puntra ta bo mes pakico pueblo ta bay manifesta dia 12 di april, ta pa e motibonan aki y hopi mas. Tur e medidanan cu nan lo a goberna sin introdusi, tur e friends and family cu a haña trabou, siendo cu a core campana bisando cu lo baha gasto di empleado, tur e persecucion, tur e falta di integridad y transparencia ta algun di e motibonan pakiko pueblo ta pidi pa un cambio y un cambio urgente.