Ta hopi tristo y algo di condena totalmente ora un gobierno cu ta pretende di tin e hende central den su maneho, ta mustra bon cla cu e hende no ta conta pa e gobierno aki ya cu na prome luga ta sponsor di Partido ta bin na prome luga, segun miembro di fraccion di AVP, Arthur Dowers a mustra.
Dowers a enfatisa cu pueblo tin prueba palpabel di e gobierno cu e tin na e momentonan aki ora cu na Pos Chikito tin e ex edificio di DTI para practicamente bashi, cu apenas algun trahado aden, pero pueblo tin cu paga huur di e edificio aki tur luna.
“Minister scorpion den dos pa tres dia di tempo a firma per direct e contrato di huur di e edificio aki cu un sponsor di su partido, sin e minimo discusion of analis haci pa mira si e por pone un facilidad pa procesa sushi mei mei den pueblo di Pos Chikito sin mas.
Sinembargo awor ta sali na cla cu e mesun minister aki ni su gobierno, no tin e trahadonan central y no a paga nan placa di pensioen pa nan por keda miembro di APFA te cu a dicidi di termina nan pensioen pa incumplimento di pago dor di gobierno.
Pues claramente pueblo por mira aki cu tanto minister Otmar Oduber como su gobierno ningun momento tin interes di pueblo na pecho, no ta pone e hende central manera cu nan a priminti di lo haci.
Mescos cu el a firma e contrato pa su sponsor haya e contract di huur aki per direct, minister Oduber mester per direct firma pa placa di pensioen di e trahadonan aki wordo manda pa e fondo di pensioen pa asina e trahadonan por recupera nan derecho cu ta wordo viola pa un gobierno y un minister cu ta den gobernacion solamente pa sirbi interes di sponsor, famia y amigonan.
Ta importante pa pueblo realisa nan mes cu e trahado, e ser humano no ta para central bou di e gobierno aki, loke ta para central ta e sponsor ta para central, e doño di partido POR ta para central, pasobra ta nan ta dicta y nan momento cu nan bisa cu tin cu firma pa nan cobra nos placa, esey ta wordo haci.
Laga nos no tin tende excusa atrobe di cu semper tabata asina ey, cu tabatin tardansa den pagamento, esey no ta na ordo aworaki, y cu nunca tabatin un gobierno of un gobernante cu por a hinca den su cabes di pone prome cu e interes di e trahado, e interes di sponsor di partido y pone sumanan hopi grandi di placa pa bay pa sponsor y keda sin cumpli cu responsabilidadnan cu nan tin cu nan organisacion.
Si e organisacion tin problema financiero, e minister no por bay subi gasto pero mester baha gasto pero para pafo di e edificio aki na Pos Chikito, nos ta mira un edificio practicamente bashi caminda placa ta stroom directamente for di saco di pueblo pa cartera di sponsor mientras cu trahadonan no a wordo poni central.
Ta importante pa realisa cu ni sindicato, caminda antes tempo cu cosnan ta bon nan ta grita tur dia pero awor caminda hasta pensioen di miembronan ta na peliger, e sindicato cu ta representa e trahadonan aki no ta sali bin dilanti y vocifera su protesta den nomber di e trahadonan.
Tur hende por a ripara caba cu e sindicato a bira un extension di e minister di POR pa organisa protesta contra MEP pero na momento cu e sindicato tin cu sali para pa su trahadonan, e no ta haci esaki.
Pueblo ta momento pa nos cuminsa realisa cu desaroyo di e pais aki ta na peliger den man di gobernantenen sinberguensa cu nos tin na e momentonan aki,” Parlamentario Arthur Dowers a declara.
