Minister di Husticia, Andin Bikker kende fuera di no ta compronde e materia, el a cuminsa perde strea di Noord, segun miembro di fraccion di AVP, sr Arthur Dowers.
Parlamentario Dowers a sigui mustra cu e Minister di Husticia ta declara na medionan di comunidacion, algun ridicules cu ta confrma su incapacidad como titular di husticia , bisando entre otro cu tin hende den partido AVP, cu lo ta jaloers riba su persona, ya cu e lo ta e unico minister, cu ta logra cende trucknan di brandweer cu pif-paf.
“Ora cu nos scucha un Minister papia den e contexto aki, ta lanta e pregunta con serio por tuma un Minister di Husticia y ta mas na su luga pa bisa Minister di Inhusticia, pa su maneho den un pais.
Minister Bikker te na e momentonan aki tin e record riba su nomber, di a laga pedofielnan bay na momento cu e mester a tene nan cera. E tin record riba su nomber di a kita y persigui ambtenaarnan, kendenan no a merece di wordo persigui, kendenan a bay Corte y gana nan caso.
E ora con por ta posibel cu abo como un persona cu den pasado a bisa cu bo ta pragmatico y cu bo tin solucion pa tur problema den e pais aki y bo kier yama bo mes minister di husticia.
Bikker ta bin den Parlamento y ta sinta gaa parlamento bisando cu no tin problema na brandweer y cu loke e trahadonan aki ta papia ta gañamento, cu no ta berdad cu ta cu pif-paf ta start e tructnan.
Cu no ta berdad cu e tin helikopter staciona den hangaar di brandweer y cu pueblo di Aruba ta paga pa cuida e helikopter aki cu ta di un compania priva, cu esakinan no ta berdad.
Sinembargo pueblo ta pagando realmente hopi miyones pa un proyecto cu no ta dunan resultado pa loke ta trata seguridad y trankilidad di pueblo.
Loke si ta un hecho cu Minister Bikker no por sconde ta segun mi persona, ta di kibra tur loke a wordo construi ultimo añanan.
Pueblo a mira un Minister cu a Sali bin dilanti y kibra un cuerpo policial ya cu despues cu e minister Bikker a sinta no tabatin Korpschef, despues el a nombra uno cu e personalmente a scoge, pa despues core cu e persona aki ora cu e Korpschef a duna un opinion cu no ta Bikker su opinion.
Na e momentonan aki henter cuerpo policial ta bou manda di un hefe interino y ta lanta e pregunta con serio Bikker ta como minister di husticia, si bo ta kere cu na momento cu e organisacionnan cu mester garantisa trankilidad y seguridad di e pais, no ta wordo maneha manera cu mester ta.
Tur esaki pa motibo cu Bikker mes no tin e curashi, no tin e conocemento pa percura pa e hendenan cu ta maneha e organisacionnan aki, ta in place y cu nan por carga nan responsabilidad.
Otro tema delicado pa loke ta trata husticia ta con un Minister por sinta gaña un pueblo y nos a trece esaki dilanti na varios ocasion, pa loke ta trata ‘toque de queda,’ gañando pueblo cu nan ta actua contra di hendenan pa motibo cu mester preveni plamamento di corona virus, mientras cu ningun momento esaki tabata e intencion. Simplemente kier a abusa di hende, limita derecho di hendenan.
Pa colmo ora cu Minister Bikker bin dilanti y insinua cu e ta e miho Minister di Husticia cu Aruba a yega di conoce pa motibo cu e por cende trucknan di brandweer cu pif-paf y cu lo tin hende jaloers riba e logro aki.
A bira tempo pa Minister Bikker ‘wake up and smell the coffee,’ lanta ariba y realisa bo mes cu e pais aki a sigui desaroya, mundo a sigui desaroya y loke bo ta haciendo simplemente no por.
Mi ta hopi cla na momento cu mi a yega di bisa y ta bolbe bisa, cu tur hende ta keto cu e bagamunderianan cu e minister aki ta haciendo, tur hende tin pasenshi pero ora cu tin otro gobierno, nos tin duda lo sinta cu tur hende, scucha tur loke no a wordo haci.
Nos lo hiba dialogonan cu tur hende, sin necesidad di demostracion of destruccion di propiedad pa yega na solucionnan cu e minister aki a priminti pero nunca a logra di haci.
Mi kier ta bon cla den algo cu Minister Bikker, esta cu no tin ningun hende jaloers aki na Aruba pa e mal trabou cu e ta haciendo ya cu mi ta sigur cu no tin ningun hende na sano huicio, cu por ta jaloers di un mal trabou cu a wordo haci pa e minister aki,” Parlamentario Arthur Dowers a declara.
