Un topico cu miembro di fraccion di AVP, sr Robert Candelaria a atende durante conferencia di prensa, ta cu el a bin ta observa cu ya pa hopi tempo tin falta di liderasgo di minister di husticia Bikker riba su cartera. Na hopi ocacion den pasado el a yega di a expresa esaki, esta cu tin falta di liderasgo den hopi area.
“Loke nos ta mira bes tras bes ta cu e minister ta papia riba un topico y anuncia cu e ta bay haci algo cu’ne. Despues e ta cuminsa tambe riba dje, pero e ta laga e asunto para y no ta bin bek riba dje.
Por a mira esaki cu e escoho di un korpschef nobo. El a cuminsa cu e procedura pa yega na un korpschef pa Cuerpo Policial, despues cu nos a cuestiona esaki y a cuestiona esaki pa motibo cu minister Bikker a duna palabra cu despues cu su persona a pone un korpschef temporal, lo bin c’un korpschef difinitivo den un periodo di un aña.

Mi a splica cu mi ta haña esaki un mal idea. Polis ta un organisacion hierargico cu mester di claridad den su structura. E ta un organisacion cu ta traha cu hopi informacion y mester tin confiansa den su top.
Ora cu bo no tin esaki, lo keda cuestiona ken ta e capitan di e boto y esaki no ta cumbini esun cu tey temporalmente, e no ta cumbini e organisacion y na final e no ta cumbini pueblo tampoco.
E mester a tuma su tempo y busca un korpschef permanente mesora. Nunca e minister a splica di con e a dicidi di pone un hende temporalmente pa un aña, pero hecho ta cu el a pone un persona temporalmente.
Te dia di awe, despues cu minister Bikker a pospone e nombracion di un korpschef permanente, no ta cla ainda ken lo lidera e cuerpo den futuro, pasobra a stop of prolonga e procedura. E ta haciendo mesun cos cu KIA.
A cuminsa e procedura y para esaki prome cu a finalisa e procedura lagando candidatonan cu a solicita, e organisacion y atrobe pueblo den incertidumbre.
Mescos a pasa cu e helicopter caminda el a cuminsa c’un lista di exigencia cu e helicopter mester cumpli cu’ne. Durante e proceso pa e haña su helicopter el a cambia e lista di exigencia.
Ora cu na final el a scohe un helicopter, e aparato no a bin e dia cu e mester a yega. Ora c’un helicopter a yega, a resulta cu no ta esun cu mester a bin.
Mi a haci un serie di pregunta over e helicopter cu ainda no a wordo contesta, pero segun nos e helicopter actual no ta loke elca bisa cu mester a bin. Atrobe ta algo temporal.
Mi ta kere cu semper algo por pasa cu ta cambia bo plan, pero si structuralmente bo forma di opera ta mescos, mi ta kere cu no ta un excepcion cerca e minister aki, cu algo no ta cana bon, of un plan ta pega. E ta mas manera “e regla” den su maneho.
E cos nunca por cuminsa y caba manera a wordo anuncia. E pregunta cu ta surgi ta dicon e minister ta keda ripiti e erornan aki? Ta falta di conocemento of tin otro motibo pa consistentemente cuminsa algo sin por cab’e?
Minister a bisa cu lo bin bek cu bario regisseurs y te dia di awe nos sa cu el a verf un bariopost pariba cu no a wordo muebla mes te pa e ta operacional. Nada a pasa cu e idea pa bin bek cu barioregissuers manera a wordo priminti ya den 2 begroting.
Pues tira cos den halto y despues no sigui riba dje of stop na caminda ta e manera di opera di e minister aki.
Con por ta posibel cu minister ta permiti cu un organisacion manera polis cu ta asina grandi cu tin un management team na cabes, awor tin un comisario so trahando?
Un miembro di e management team ta bay un otro departamento y nunca mas ta yena e vacatura aki. Minister ta laga e problemanan aki habri y no ta atende cu nan,” Parlamentario Robert Candelaria a declara.