Fraccion di AVP a dirigi varios carta tanto pa Gobierno como pa Parlamento pa haya informacion riba varios desaroyo cu a bin ta tumando luga y un di e cartanan aki a bay pa Prome Minister Evelyn Wever Croes relaciona cu desaroyonan rond di e refineria na San Nicolas.

Parlamentario Sneek a mustra cu ta conoci cu gobierno di MEP semper a traha pa cera refineria contrario nba loke gobierno di AVP a haci pa haya tur forma di logra reapertura di e refineria mirando e balor grandi cu e lo tin den desaroyo economico y comercial pa e pais.

“AVP a dirigi un carta pa Prome Minister caminda nos ta pidi pa resultado of pa haya copia di e rapport di e investigacion cu Evelyn Wever Croes mes a anuncia cu su gobierno lo haci na inicio di e periodo di gobernacion.

Ta trata di un  investigacion cu Prome Minister a bisa cu su gobierno ta bay haci relaciona cu  e contract firma cu e compania CITGO pero cu te dia di awe, ningun hende a mira e rapport of resultado di e investigacion.

Di con nos kier claridad den e asunto aki ta pa e hecho cu mientras cu ta bisa cantidad di cos aki na Aruba, ta bin resulta cu gobierno a manda un comision Miami pa bay atende cu e asunto di contract cu CITGO pa loke lo ta trata ceramento di e refineria.
Durante di e proceso di haya un compania pa logra reapertura di e refineria, semper gobierno a informa Parlamento debidamente riba tur desaroyo pero for di momento cu Gabinete Wever Croes a bira un realidad, tur cos a bay den pochi caminda tabata bisto cu un punto cardinal di e acuerdo di gobernacion entre e tres partidonan actual cu ta sostene gobierno, ta cu refineria tin cu bay ya cu tin otro prioridadnan politico y financiero cu mester bin na prome luga.

No pa pueblo, ya cu a keda demostra bon cla den ultimo dos aña, cu Gabinete Wever Croes en berdad tin e hende na pecho, caminda e hende ta central den nan maneho pero na mes momento tabata bisto cu no ta pueblo ta bin na prome luga, no ta pueblo general ta central, pero tur hende cu ta famia y amigo, tur hende cu a sponsor, tur hende cu ta sostene e partido ta bin na prome luga.
Fraccion di AVP kier mira e rapport di e investigacion cu Prome Minister a bisa cu lo wordo haci, ya cu mientras cu no tin ningun deliberacion tumando luga pa trata di logra reapertura di e refineria, tin un comision na Miami hibando deliberacion pa atende cu e contract y pone fin na presencia di CITGO na Aruba.

Tur esaki mientras cu tin otro esfuersonan tumando luga caba, ehercicionan comercial tumando luga pa mira kende ta haya kico y kende ta pasa man pa FMSA caminda ya caba por mira cu tin trucknan di refuel di e compania W-Aviation, cu nomber nobo riba trucknan cu mester duna servicio di combestible na avion.

Pues pueblo no sa di nada, Parlamento no sa di nada, nada ta ser haci pa logra reapertura di e refineria di San Nicolas mientras cu gobierno ta bon na altura di e impacto economico grandi cu esaki lo tin pa economia di Aruba y di San Nicolas.

Den pasado Minister Andin Bikker tabatin tres compania interesa pa habri e refineria pero ora cu nan mester a bin un reunion cu Parlamento, nan tur a bira malo y tur cos ta mustra cu nan tga malo te dia di awe.

Prome Minister Evelyn Wever Croes tambe tabatin cantidad di compania interesa, bisando hasta cu portanan cu ta habri pa su persona, no ta habri pa Mike Eman pero despues di dos aña den gobernacion, ta parce cu e portanan aki ta bon claba y tur bentana ta bon gelijm pa Evelyn no drenta mas.

Fraccion di AVP kier informacion riba tur proceso tumando luga, tur loke ta wordo haci, apesar cu tur hende sa cu gobierno di Aruba mes nunca a yega Houstton pa reuni cu CITGO pero lo tin otro trabounan na banda tumando luga caminda a cuminsa cu partimento di bolo,” Parlamentario Marlon Sneek a declara.