Durante e conferencia di prensa di Fraccion di AVP diamars mainta, Marlon Sneek, lider di Fraccion di AVP, a elabora riba algun punto relaciona cu tratamento di presupuesto 2018 cu a ser trata den Parlamento.
Sr. Sneek a bay riba e tema di e cantidad di promesanan cu a wordo haci door di MEP den campaña y cu awor a resulta di ta un engaño pasobra no ta cumpliendo cu nan den e presupuesto. P’esey awe e no ta papia di Movimento Electoral di Pueblo pero Movimento Engaño di Pueblo. A papia di un Presupuesto unda cu ta bay corta gastonan. Den e documentonan tin para cu ta bay tin un deficit di 3% di GDP den 2018, mientras cu den 2017 e tabata 2.8%. Esey ta e prome fayo, e ta bisa, pa pone Finansa Publico na ordo.
A papia di un entrada husto pa e ciudadanonan, pero a bati e pueblo cu un BBO di 2.5%, hisa accijns cu 10 cen pa saca 10 miyon mas. Pues ta bay haya un inflacion di sigur 10%.
Tambe por a lesa den e presupuesto un aumento di gasto di 100 miyon florin. A crea un impresion cu AVP lo a laga un desaster atras, cu pa via di AVP un BAZ mester bini pa supuestamente paga pa Green Corridor y AZV, pero tin un aumento di gasto di 100 miyon florin en bes di corta pa haya un Finansa Publico saludabel.
E presupuestonan di e Gabinete anterior ta mustra cu tur aña a corta den gastonan y a hisa entradanan pa garantisa cu por a cumpli cu e puntonan presenta. No por gaña cu a laga un desaster atras pasobra cuentanan anual di 2016 a wordo controla y ta bisa cu a cumpli cu 2% di deficit.
A papia tambe cu lo baha gasto di prestamo y interes. Por mira cu a pone 219 miyon pa wordo paga na interes di prestamo compara cu na aña 2017 cu e tabata 215 miyon florin.
Gasto di personal ta 382 miyon florin en comparacion cu e 378 miyon florin cu e Gobierno di AVP den 2017. Pues un aumento.
Nan a papia cu ta baha gasto di biahe pasobra Ministernan ta biaha mucho. Den presupuesto 2018 ta para cu 1.9 miyon florin presupuesta en comparacion cu e 1.7 miyon na 2017.
Pa 2018 a pone 3.3 miyon florin pa ‘promotie & voorlichting’ siendo cu den presupuesto di 2017 e tabata 2.8 miyon, un otro aumento en bes di baha.
Explotatiekosten (gastonan fiho di Gobierno) cu tambe a mira aumento pasobra di 378 miyon a bira 382, conseho di expertonan a bira 14.5 miyon florin en comparacion cu 13 miyon di aña pasa.
Pues tur caminda tin aumento y nada di loke a priminti cu lo baha e gastonan. E forma cu a scoge pa subi entrada ta via medida.
Tanto cu nan a keha cu ta uzando entradanan incidental di Gobierno anterior, awor tin diferente entrada incidental poni riba presupuesto en bes di entradanan structural pa yega na un presupuesto real.
Un presupuesto makiya cu medida cu ta algo cu AVP no por para banda di dje pasobra no ta mira seriedad di Gobierno. No por pidi pueblo hala faha mara pero abo ta gasta 100 miyon extra. “Nan ta haci tur lo contrario di loke nan a priminti y esaki ta sin conta e 100 hendenan extra cu ta wordo bisa cu a wordo tuma den Gobierno, mientras cu a manda 300 hende di AVP cas. Esaki ta nifica cu nan a tuma 400 hende na trabou den 4 luna di tempo,” lider di fraccion di AVP, Marlon Sneek a declara.
