Un desaroyo cu tin atencion di fraccion di AVP sin duda, ta publicacionan cu a sali y informacion cu ta sigui drenta riba e desaroyonan rond di e posicion di miembro di fraccion di MEP, sr Luigi Bergen.

Lider di fraccion Marlon Sneek a mustra cu ta trata sigur di  un situacion hopi serio ya cu simplemente no por acepta c’un Parlamentario ta negociando su asiento a cambio di un puesto ehecutivo den un of otro impresa estatal.

“Nos tin informacion cu e meneer aki ta negociando su asiento, caminda pa entrega partido su asiento den Parlamento,  e lo ta pidiendo pa sea bira director  sea na Utilities of  director na DTP, hasta na e departamento nobo cu ta lantando relaciona cu legalisacion di cannabis  y pa nos esaki ta algo inaceptabel.

Fraccion di AVP sigur ta pidi Señor Gobernado, kende ta esun cu mester bay firma e ‘Landbesluit’ riba esaki, pa pone bon bista riba e asunto aki  ya cu e ta castigabel pa bo negocia cu asiento di Parlamento.

Abo como Parlamentario cu tin un asiento den Parlamento, no por negocia bo trabou di futuro y no por negocia nada pa bo haya pa asina bo entrega bo asiento bek na partido.

Nos ta haci un apelacion na tur hende cu ta busca tur caminda manera sa pasa riba facebook caminda hasta ta busca cosnan pa keha hende na Ministerio Publico, pa nan pone bista riba e meneer aki ora cu e no ta Parlamentario mas, pa mira cua funcion el a haya for di gobierno y con e negociacionnan aki a tuma luga.

E cos aki ta inceptabel si e tuma luga y nos lo tin cu bay atende cu esaki sigur ya cu simplemente contra tur regla existente y sigur no por ta parti di un gobierno cu tur ora ta papia di integridad pero aki ta informacionnan cu ta sigui yega cerca nos, hasta di hendenan di  e partido di cual e parlamentario aki ta forma parti di dje, kendenan no ta contento cu loke ta tumando luga,”  Parlamentario Marlon Sneek a declara.