Durante e reunion di Parlamento pa trata e presupuesto di DOW e lider di fraccion di AVP, mr. Mike Eman, a tene un eloquente disertacion riba e vision cu a worde carga cu a conduci na cambionan grandi na Aruba den infrastructura, spacionan publico, centronan di ciudad, barionan y schoolnan, entre 2009 y 2017. 

Hopi inversion pa renoba y modernisa tur aspecto di nos isla a worde realisa den e tempo ey. Eman a splica cu esaki a worde realisa den contexto di un vision completo pa hisa e calidad di bida na Aruba, haci Aruba su producto mas competitivo, crea oportunidnan economico nobo y duna un impulso na e economía di Aruba na e momento cu mas e tabata tin mester di dje. 

Mustrando riba e cambionan grandi aki Eman a presenta tambe un mocion den nomber di fraccion di AVP cu ta invatisa cu mehoracion di calidad di bida den nos barionan y centro di ciudadnan ta rekiri atencion y inversion continuo. 

E mocion di Fraccion di AVP ta bisa cu despues cu Aruba a hasi inversionan grandi pa renoba y modernisa nos infrastructura y revitalisa nos centro di ciudadnan y barionan, por a mira un adelanto importante den oportunidadnan y uso di e espacio publico na Aruba y den fluidez, eficiencia y seguridad den trafico.

Sin embargo e ultimo 4 anjanan no ta mira cu a sigui cu e vision aki. Alcontrario, ta cuminsa ripara y constata deteoro atrobe den infrastructura, spacionan publico, centronan di ciudad, barionan y schoolnan.

Eman a invatisa den su splicacion riba e mocion cu modernisacion, mantencion y adaptacion di nos espacio publico y infrastructura mester ta un punto di atencion continuo den maneho di gobierno. 

Locual e fraccion di AVP ta mira cu den trafico na Aruba tin un nececidad grandi y urgente pa mas modernisacion y adaptacion pa mehora fluidez, eficiciencia y seguridad.

Pesey e mocion di AVP ta urgi gobierno pa mas liher posibel presenta un maneho y iniciativanan cu ta responde na e necesidad di modernisacion, mehoracion, adaptacion y mantencion continuo di nos espacio publico y infrastructura fisico, cu atencion special pa e areanan y aspectonan caminda ainda tin retonan cu fluidez, eficiencia y seguridad den trafico. 

E mocion di Fraccion di AVP a worde sosteni dor di e fraccion di MAS y ACCION 21. Lamentablemente e fraccion di MEP y RAIZ no a sostene e mocion. E líder di fraccion di AVP, mr. Mike Eman, y colega parlamentario mr. Gerlien Croes na final di e reunion a invatisa e falta di un vision di gobierno pa cu e tema importante aki. Nan a mustra cu esaki tambe ta resaltando den e deterioro cu ta sacando su cabez tur caminda atrobe den e estado físico di nos isla.