Parlamanetario Marisol Lopes Tromp tin pregunta riba e proyecto di hotel cu su lider di patido y actual minister di infrastructura, Otmar Oduber y minister di turismo Dangui Oduber a firma siman pasa un MOU, mientras cu su persona segun miembro di fraccion di AVP, Benny Sevinger, e ta bon na altura di e proyecto aki ya cu el a otorga e grupo aki un pida tereno den su tempo como minister di infrastructura.
Benny Sevinger a mustr cu e proyecto aki di Caledonian, ta un erfpacht cu a wordo firma dor di Marisol Lopez Tromp, e mesun aña cu e tabata den Parlamento pa pasa e ley di Ruimtelijke Ordening y cu el a haci firma esaki dia 3 di mei.
Ta trata aki di un tereno priva di 11 mil meter cuadra, pero e grupo despues a mustra cu nan tabatin mester di 25 mil meter cuadra pa construi un hotel.
“A yega na e deal cu Caledonion ta duna gobierno su 10 mil meter cuadra y a cambio gobierno di MEP e tempo ey, ta duna e grupo nan 27.728 M2.
Abo Marisol, a firma pa e tereno aki bay pa Caledonian, no ta Benny Sevinger y no por purba trece mentira pasobra ta bo firma ta aparece bou di e documento aki.
Den e condicion di e erfpacht ta para cu e tereno no por wordo usa pa nada otro c’un hotel construi di beton di 481 camber, a menos cu haya permiso di e minister concerni.
Esaki tabata un di e ultimo pida terenonan cu gobierno tabatin y e 481 cambernan aki ta parti di e 7 mil cambernan cu Marisol a otorga y cu awor e ta pretende cu ta Benny a laga esakinan atras.
E mas tristo ta cu ora cu a duna e tereno aki, , DOW a puntra unda e trahado y e bishitantenan ta bay staciona, pasobra no tin luga y aki Marisol e tempo ey pa e hotel por crea parkeerplaats pa personal, a duna e grupo un pida tereno den e Saliña, den e wetland, panort net patras di The Mill y ta abo Marisol a duna e pida e tereno aki, no Benny Sevinger.
Ocho aña largo mi a haya carta tras di carta di e hendenan aki, ocho aña largo mi a want’e pasobra mi no tabata di acuerdo cu loke Marisol a firma, pa construi un parkeerplaats den e wetland banda di The Mill.
Pero Caledonian a cambia di doño, a cay den man di Marriott, kendenan a bin reuni cu Gobierno di Aruba y nan tabata kier construi un hotel ey, pero nan no kier ta doño di e propiedad y tabata interesa solamente pa maneha e propiedad.
Nan tabata kier pa Gobierno di Aruba coopera pa bende e tereno c’un desaroyado cu nan tabatin na bista caba y ta e desaroyado aki, e dos ministernan Oduber a firma e ‘deal’ cu a wordo ‘geseal’ siman pasa.
Gobierno anterior a puntra Marriott si nan ta kere cu ta corecto cu nan kier haya permiso pa bende un propiedad di pais Aruba pa 17 miyon dollar sin cu Aruba mes no ta haya nada a cambio. E grupo a keda di manda un proposicion kico nan lo haci a cambio pa Aruba si duna nan cooperacion pa pasa e tereno pa otro desaroyado.
Awor AVP ta tende cu e tereno a wordo bendi, esta a “seal the deal” pero prome cu esey e gobierno di AVP a pidi un ‘Letter of Intent’ y e cambionan pidi ta suheto na negociacion.
Caledonian y Marriott no tin ningun disputo legal riba e cambionan cu ta pidi y nan mester tin aprobacion di Marriott Internacional pa haci cambio.
Awo no sa si e gobierno nobo a negocia a base di e 4 condicionnan ey of a simplemente a firma e MOU cu e grupo nobo. Ademas a pone tambe cu e negociacion lo wordo haci door di DIP cu Marriott.
Pues e tereno aki a wordo duna 12 aña pasa y no a logra construi pasobra pa 8 aña gobierno di AVP a wanta e proyecto ya cu no tabata di acuerdo pa mas camber di hotel y awo den 7 luna e Gabinete Wever Croes a “seal the deal” y pueblo no a haya nada di e deal aki di 17 miyon dollar. Pronto lo haya sa unda e sponser lo a cay”, Sevinger a termina bisando.
