Un gobierno serio tin cu keda serio y den e tempo dificil aki cu pueblo ta pasando aden, gabinete Wever Croes ta e prome yama pa mustra su preocupacion y seriedad den e situacion cu tin na e momentonan aki.

Melvikn Tromp miembro di partido AVP a mustra cu ta masha leuk cu gabinete Wever Croes a bay tuma nan presion, tratando na motiva pueblo pa tur hende haci mesun cos, esta cu ta importante pa  hende controla nan presion.

“Ta necesario pa gobernantenan duna e bon ehempel, ta necesario pa gobernantenan duna pueblo e direccion corecto, entre otro mustrando cu tur hende tin cu percura pa nan salud, percura cu nan ta tuma tempo na controla nan salud prome cu ta lat.

Sinembargo ora cu mira tur e ministernan aki di gabinete Wever Croes ta controla nan  presion, pueblo por mira mesora cu ta mesun grupo di ministernan aki, ta esunnan cu ta dunando pueblo e presion grandi di inflacion cu tur dia pueblo ta mirando na momento di haci compra.

Loke ta mas tristo ainda ora cu mira e mesun mandatarionan aki tratando na duna un bon ehempel, nan no ta realisa cu ta pidi pueblo pa contrala nan salud pero ta nan  mes a dicididi permiti Hulanda reduci cuido medico cu f5 miyon tur luna.

Ta mesun ministernan aki a dicidi cu pueblo lo no sigui haya tur su remedinan mas, ta nan mes a dicidi cu dentro di poco, kisas algun dia mas,  pueblo lo tin cu paga nan “eigenbijdrage” pa loke ta nan cuido medico.

Ta mesun hendenan aki, cu ta masacrando pueblo su salud for di otro, awor kier hunga e santonan di devocion,  mientras cu pueblo ta sufriendo  cu un inflacion for di control camindano tin un solo minister, cu ta brindando pueblo un solucion.

Un biaha mas pueblo por ripara e arogancia di e actual mandatarionan, cu for  di 2017 ta hincando pueblo den un skina preta cu cantidad di medida, awor kier pidi pueblo pa bay controla nan presion mientras cu e presion di mas grandi cu pueblo tin na e momentonan aki, ta e presion di un gobierno cu no tin bienestar di pueblo na pecho,” Melvin Tromp a señala.