Un gobierno cu for di prome dia no ta sincero cu pueblo, y no a cumpli cu promesanan haci, nunca mas lo mustra sinceridad cu pueblo y esaki ta notabel cu Gabinete Wever Croes segun lider di fraccion di AVP, sr Marlon Sneek ta señala.

Sr Sneek a mustra cu for di momento cu algun siman atras a keda publica e forma con ministernan ta biahando rond mundo, gastando miyones di florin di pueblo sin cu pueblo ta beneficia di e tournan internacional aki, Gabinete Wever Croes a bay over na sigui cu su vision di gaña pueblo.

“For di momento cu a bira conoci e forma desproporcional cu ministernan di e gobierno aki a gastando placa na biaha, a bin ripara cu ya no ta informando Parlamento mas ora nan Sali di biahe.

Nos por a tuma nota cu tabatin dos minister cu no tabata na Aruba y Parlamento no a haya notificacion di esaki y ta algo cu ta di lamenta ya cu esaki ta e gabinete cu a priminti pueblo transparencia.

Despues cu pueblo por a mira cuanto tempo nan tur ta pasando for di Aruba y cuanto placa esaki a costa, Gabinete Wever Croes a scohe awo pa sconde nan biahenan, pues Parlamento di Aruba no ta na altura di e biahenan aki.

Ministernan manera ta ley, manera ta regla desde 1986 bin ariba, semper cualkier minister cu bandona teritorio, ta manda un carta y ta bisa cu nan ta cu vakantie di tal fecha pa tal fecha na tal luga.

Awo por mira cu dos Minister ta pafo di Aruba y Parlamento di Aruba no ta na altura cu e ministernan aki a bandona e isla y pa nos esaki sigur ta di lamenta pasobra esaki ta hendenan cu a priminti transparencia y si no tin nada di sconde, di con no ta manda informa Parlamento debidamente cu nan ta pafo di e isla pero no ta haci esaki.

Pa nos ta importante pa Ministernan informa Parlamento cu nan ta biaha pa exterior, si nan a bay di biahe di placer, biahe pa atende asuntonan medico of cualkier otro tipo di biahe pero no cu miembronan di Parlamento a base di entrevista- y grabacionnan ta bin ripara cu nan ta den exterior y ta atende asuntonan interno for di exterior.