Un cancion masha popular di e popular cantante den feliz memoria, Cecil Grovel, tabata bisa cierto momento: “bebe lechi lubida di cua baca a chik’e,” y esaki ta loke e miembro di partido AVP, sr Melvin Tromp a señala ayera mainta durante e reunion publico di Parlamento.
Un reunion cu a wordo pidi no pa Parlamento, pero pa e propio Minister Oduber kende a busca caminda na Parlamento den loke Melvin Tromp ta considera buscamento di forma pa desacredita un proyecto asina importante di gobierno di AVP.
“Pa colmo ta trata aki di un proyecto cu a conta cu sosten y firma di e actual Minister Oduber, kende pa di cos ocasion den menos cu dos luna di gobernacion di coalicion POR-MEP-RED, ta bin Parlamento pa busca placa pa e haci algo.
Ningun otro Minister di partido MEP a haci esaki ainda ya cu ainda ni presupuesto pa 2018 a keda cla pero Minister Oduber ya ta buscando cu anticipacion pa e haya fondo na su disposicion, Melvin Tromp di AVP a mustra.
“Kisas e aspecto di mas straño durante di e reunion di ayera, tabata e insistencia di Minister Oduber, pa trata di distancia su mes di dos gobierno di partido AVP, distancia su mes di mas cu 20 aña di formacion y educacion politico den e organisacion di AVP, y distancia su mes di ex coleganan den Conseho di Minister, kendenan el a yega di elogia den forma increibel den mesun sala di Parlamento.
Na momento cu Minister Oduber dirigi su mes na su ex colega Minister cu ‘pueblo a rechasa su maneho,” ta lanta e pregunta si Oduber a analisa resultado di eleccion ultimo, ya cu como miembro di partido y gobierno di AVP, Minister Oduber tabata cerca di 5000 voto na 2013 pero den eleccion di 2017 su persona no a logra ni 2000 voto mustrando cu el a wordo rechasa pa su decision politico cu el a tuma.
Hunto cu Minister Oduber tambe mi a keda asombra di scucha Marisol Lopez Tromp kende tambe a bin ta pretende di no sa di nada, di no sa di e proyectonan aki, mientras cu tin decisionnan cu Parlamento a tuma relaciona cu e proyectonan aki, bou di cual su firma ta para.
Ta hopi raro scucha Marisol papia di proceduranan den e proyecto di green corridor, net su persona cu te dia di awe nunca a presenta e proceduranan cu el a hiba pa construccion di un brug di Madushi na Noord.
Ta mesun persona aki no a sigui procedura y obligacion como Presidente di Parlamento ora cu el a manda busca su esposo pa bin tira mokete den Parlamento y despues na cantidad di reunion sea e no a participa of a bandona reunion tempran y keda sin sostene of desaproba mocionnan trata den Parlamento den ultimo añanan.
E actuacion di Marisol ta pone nos corda den e periodo di carnaval aki, ora cu SAC tabata corona Reina di un districto sin cu tin eleccion pa falta di interes y awor ta Marisol kier corona su mes Reina di oposicion pa opone maneho di un gobierno cu e mes a forma parti di dje mas cu tres aña largo.
Ta mas cu claro cu Minister Oduber a tuma e posicion aki di trata di desacredita tur proyecto di AVP ya cu awendia keto bay den tur bario cu nos pueblo drenta of move, ta mira e desaroyo y resultado di ocho aña di gobernacion di partido AVP.
Proyectonan den ehecucion ainda di gobierno di AVP y esey ta e dolor mas grandi di Minister Oduber na e momentonan aki ya cu den menos di dos luna den gobierno di MEP, Oduber ya caba ta dirigi e oposicion contra e partido cu a brinda su persona un carera den politica di nos pais,” sr Melvin Tromp vocero di AVP a mustra.
